АҚШ Давлат департаменти Украинага Hawk ҳаво мудофаа ракета тизимларига хизмат кўрсатиш учун 108,1 миллион долларлик ускуналар сотилишини маъқуллади.
Идора маълумотига кўра, Украина ҳукумати мазкур тизимлар учун тайёр мачтали трейлерлар, таъмирлаш ва техник хизмат кўрсатиш ишлари, эҳтиёт қисмлар, сарф материаллари ҳамда бутловчи қисмларни сотиб олишни сўраган.
Шунингдек, муҳандислик, дастурий таъминот, логистика ёрдами ва техник таъмирлаш хизматлари ҳам пакетдан ўрин олган.
АҚШ Давлат департаменти баёнотида таъкидланишича, ушбу келишув Европа ҳудудида сиёсий ва иқтисодий барқарорликни мустаҳкамлашга хизмат қилувчи ҳамкор давлат хавфсизлигини ошириш орқали Вашингтоннинг ташқи сиёсат ва миллий хавфсизлик мақсадларига мос келади.
Лойиҳанинг асосий пудратчиси сифатида “Сьерра Невада Корпорейшн” компанияси фаолият юритади.
Шунингдек, май ойи бошида АҚШ Давлат департаменти Украинага 373,6 миллион долларлик JDAM тўғридан-тўғри зарба берувчи авиация ўқ-дори тизимлари ва тегишли ускуналарни сотишни ҳам маъқуллаган эди.
Бундан аввал АҚШ мудофаа котиби Пит Хегсет Конгресс Ваколатчилар палатасининг Қуролли кучлар қўмитаси йиғилишида Украина хавфсизлигига ёрдам бериш ташаббуси (USAI) доирасида 400 миллион долларлик ҳарбий ёрдам ажратилишини эълон қилган.
Маълумотларга кўра, ушбу маблағ 2026 ва 2027 йилларда ажратилиши режалаштирилган.
Дональд Трамп маъмурияти ҳокимиятга келганидан сўнг АҚШнинг Украинага ҳарбий ёрдами кескин қисқаргани, Вашингтон эса асосий эътиборни урушни якунлаш бўйича воситачилик ҳаракатларига қаратгани айтилмоқда.
Шу билан бирга, PURL ташаббуси ишга туширилган бўлиб, унга кўра АҚШнинг НАТОдаги иттифоқчилари Украина учун Америка қуролларини сотиб олмоқда.
