Қозоғистон Maxa.dxb номи билан танилган ўзбекистонлик блогер Маҳмуд Ҳикматовни халқаро қидирувга берди. Бу ҳақда ҳукумат сайтида хабар берилди.
Ҳикматов 2000 йилда Ўзбекистонда таваллуд топган. У ноқонуний интернет-казино рекламасида гумон қилинмоқда. Суд қамоққа олиш тарзидаги эҳтиёт чорасини танлаган. У ҳақдаги маълумот учун мукофот ва анонимлик ваъда қилинган.
Қозоғистон Молиявий мониторинг агентлигига кўра, мамлакатда қимор ўйинлари интерфейсини яратиш, тўловларни эквайринг, мобил ўтказмалар ҳамда криптовалюта орқали қайта ишлаш ва фойдаланувчиларни жалб этишга қаратилган реклама схемаси фаолият юритган.
Ҳикматов казиноларни тарғиб қилиш учун қозоғистонлик блогерларни жалб этишга масъул бўлган. Улардан реклама нархини аниқлаш учун ижтимоий тармоқ статистикаси — демография, обуначилар географияси ва аудитория қамровини сўраган. Тергов маълумотларига кўра, у жами 35 дан ортиқ блогерни ноқонуний фаолиятга жалб этган.
Схема иштирокчиларидан бири блогер Қамза Қ. ҳисобланади, у ўзининг машҳурлигидан фойдаланиб, казиноларга реферал ҳаволаларни жойлаштирган ва фойдаланувчиларнинг ўтишлари учун мукофот олган. 6 август куни у Вьетнамдан экстрадиция қилинган эди.
