Буюк Британия Эрон атрофидаги кескин вазият туфайли хавфсизликни кучайтириш мақсадида Кипрдаги Акротири авиабазасига қирувчи самолётлар юборди. Бу ҳақда The Times газетаси хабар бермоқда.
Мақолада айтилишича, олтита F-35B Кипрда жойлашган ва Ироқ ҳамда Сурия устида вазифаларни бажараётган Typhoon самолётларига қўшилади. Қирувчи самолётлар Англиянинг шарқидаги Марҳам базасини аллақачон тарк этган.
Ҳужум ва қўриқлаш вазифаларида доимий равишда иштирок этадиган Typhoon’дан фарқли ўлароқ, F-35B айнан мудофаа вазифаси учун жўнатилган. Яъни Эрон атрофидаги вазият кескин кучайган тақдирда кафолат сифатида хизмат қилиши кўзда тутилган.
Шу фонда Лондон январь ойида 12-сонли қўшма инглиз-қатар эскадрилясидан тўртта Typhoon’ни минтақадаги вазият кескинлашишидан хавотирга тушган Доҳанинг илтимосига кўра Қатарга юборган эди.
