Тошкент вилоятининг Зангиота туманида наркокурерлар қолдириб кетган қарийб 5 кило наркотик модда топилди. Бу ҳақда Давлат хавфсизлик хизмати хабар берди.
У гиёҳвандлик воситаларининг ноқонуний айланмасига қарши курашиш доирасида ДХХ томонидан Ички ишлар ва Божхона органлари билан ҳамкорликда амалга оширилган тезкор-қидирув тадбирлари натижасида топилди.
Жами 10 дона ўрамдаги 4 кило 956 грамм опий моддаси Тошкент катта ҳалқа автомобиль йўлига яқин бўлган хуфия жойга наркокурерлар томонидан қолдириб кетилган бўлиб, у холислар иштирокида расмийлаштириб олинди.
Таъкидланишича, бу турдаги гиёҳвандлик воситалари Ўзбекистонга хориждан контрабанда йўли билан олиб келинади.
Ҳозирда Жиноят кодексининг 273-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан жиноят иши қўзғатилиб, ушбу гиёҳвандлик моддаси эгаларининг шахсини аниқлаш бўйича зарур чора-тадбирлар амалга оширилмоқда.
