Хитойнинг Далян шаҳрида 11-қават ойнасидан тушиб кетган тўрт ёшли бола тирик қолди. Бу ҳақда South China Morning Post хабар берди.
Воқеа 11 апрель куни Ляонин провинциясида юз берган. Хиаоминг исмли бола ота-онаси юк етказиб бериш учун кўчага чиққанида, уйда ёлғиз қолган. Онасининг айтишича, хонадон эшиги ва дераза тўри (сеткаси) қулфланган, уйдаги вазият эса камера орқали назорат қилиб турилган. Бироқ бола қандайдир тарзда деразанинг калитини топиб, уни ўзи очишга муваффақ бўлган.
Икки соатдан кейин уйга қайтган ота ўғлини хонадондан топа олмагач, пастга тушган ва уни бино яқинидаги бетон майдончада ётганини кўрган. Шифохонага етказилган боланинг суяклари сингани, жигари, талоғи, ўпкаси ва буйраклари жиддий шикастлангани маълум бўлган. Шифокорлар унинг омон қолиш имкониятини бор-йўғи 5 фоизга баҳолаган. Бироқ реанимациядаги 18 кунлик курашдан кейин бола палатага ўтказилган.
Бола ҳушига келгач, онасига йиғлаб, уни жуда соғингани ва уйга қайтаётганини кўриш учун деразага чиққанини айтган:
“Ўғлим жуда ақлли ва тушунадиган бола. Ундан нега деразага чиққанини сўраганимизда, шунчаки мени соғингани учун йўлимизни пойлаганини айтди”, дейди она.
Боланинг отаси Сонг эса шифохонадаги оғир кунларни шундай эслайди:
“Ҳар сафар шифокорлар билан учрашганимизда, бизга нохуш хабар беришидан қўрқиб турардик”.
Ҳозирда Хиаоминг даволанишни давом эттирмоқда ва реабилитация жараёнидан ўтмоқда. Ота-онаси унинг тўлиқ соғайиб кетишига ишонч билдирди.
Хитойда баланд қаватлардан йиқилиш билан боғлиқ ҳодисалар тез-тез жамоатчилик эътиборига тушади. Масалан, 2025 йили Хебей провинциясида 9 ёшли қизалоқ 25-қаватдан тушиб кетиб, 18 қават пастдаги платформага тушган ва омон қолганди. Бироқ Хайнан провинциясида бувиси дўконга кетганида уйда ёлғиз қолган 3 ёшли бола 27-қаватдан йиқилиб, ҳалок бўлган.
Хитойнинг Вояга етмаганларни ҳимоя қилиш тўғрисидаги қонунига кўра, ота-оналар ёки васийларга 8 ёшгача бўлган болаларни назоратсиз қолдириш тақиқланади. Шунга қарамай, бундай бахтсиз ҳодисалар содир бўлганда, ота-оналарнинг жавобгарликка тортилиш ҳолатлари деярли кузатилмайди.
