Саратонни ўрганиш бўйича халқаро агентлик (IARC) олимлари 2024 йилда дунёдаги барча саратон ташхисларининг қарийб 12 фоизига инфекциялар сабаб бўлганини аниқлади. Бу тахминан 2,3 миллион бемор дегани. Тадқиқот натижалари The Lancet Oncology журналида эълон қилинди.
Олимлар саратон ривожланишига олиб келиши мумкин бўлган инфекциялар қаторига Helicobacter pylori бактерияси, инсон папиллома вируси (HPV), B ва C гепатит вируслари ҳамда Epstein–Barr вирусини киритган. Тадқиқотга кўра, янги саратон ҳолатларининг қарийб 4 фоизига H. pylori бактерияси, яна 4 фоизига HPV сабаб бўлган. B гепатити вируси тахминан 2 фоиз, Epstein–Barr вируси эса 1 фоиз ҳолатда аниқланган.
Инфекциялар 20 дан ортиқ саратон турига сабаб бўлиши мумкин. Улар орасида ошқозон, жигар ва бачадон бўйни саратони, шунингдек, қон саратонининг айрим турлари бор.
Инфекциялар саратон ривожланишига турлича таъсир қилади. Айрим вируслар ҳужайралар ишини бузади ёки ўз ДНКсини инсон ҳужайраларига киритади. Бактериялар эса узоқ давом этадиган яллиғланишни келтириб чиқариб, ҳужайраларда мутация юз бериш хавфини оширади.
Олимлар ушбу инфекциялар туфайли юзага келадиган кўплаб саратон ҳолатларининг олдини олиш мумкинлигини таъкидламоқда.
Ҳозирда HPV ва B гепатитига қарши ваксиналар мавжуд. Helicobacter pylori инфекциясини аниқлаш ва антибиотиклар билан даволаш мумкин. C гепатитини даволаш учун эса вирусга қарши дорилар қўлланади.
