Навоий шаҳрида “Хавфсиз ва соғлом юрт” тезкор-профилактик тадбирлари давомида гиёҳвандлик моддаларини тарқатиш билан шуғулланган жиноий гуруҳ фаолиятига чек қўйилди. Бу ҳақда вилоят ИИБ хабар берди.
Маълум қилинишича, ИИБ тезкор-қидирув хизмати ҳамда ДХХ вилоят бошқармаси ходимлари ҳамкорлигида ўтказилган тадбирда 2000-йилда туғилган йигит 2 граммга яқин гашишни 600 минг сўмга сотаётган вақтида қўлга олинган. Кейинги тезкор ҳаракатлар давомида у гиёҳвандлик моддаларини 1999 ва 2000-йилларда туғилган шахслардан олгани аниқланган.
Ушбу шахслар қўлга олинганда уларнинг ёнидан 8 ампула гашиш мойи ва 10 дона фолга қоғозга ўралган 6 грамм гашиш топилган. Аниқланишича, улар Telegram’даги махсус бот орқали “таъминотчи” сифатида фаолият юритиб, гиёҳвандлик моддаларини мижоз билан учрашмасдан яширин жойларга қолдириш орқали тарқатиб келган.
Терговга қадар текширувларда гумонланувчилардан бири жорий йил январь ойида бот орқали гуруҳга қўшилиб, онлайн кўрсатмалар асосида ўз яшаш хонадонида гиёҳвандлик моддаларини қўлбола усулда тайёрлагани маълум бўлган. Ўтказилган тинтувларда 34 дона қадоқланган гашиш, жами 1 кг 477 грамм гиёҳвандлик моддалари ҳамда уларни тайёрлаш ва қадоқлаш учун мўлжалланган буюмлар далилий ашё сифатида расмийлаштириб олинган.
Шунингдек, гуруҳ томонидан вилоят ҳудудида яширин жойларга қолдирилган моддалар манзиллари аниқланиб, у ердан ҳам қўшимча гашиш мойи топилган. Маълумотларга кўра, ушбу жиноий гуруҳ шу кунга қадар 1000 дан ортиқ манзилга гиёҳвандлик моддаларини жойлаштирган.
Ҳуқуқни муҳофаза қилувчи органлар томонидан гуруҳнинг келгусида 2,5 килограмм гашишни тарқатиш режалари ҳам фош этилди. Ходимларнинг тезкор ҳаракатлари натижасида минглаб фуқароларнинг заҳриқотил қурбони бўлишининг олди олинди.
Мазкур ҳолат юзасидан Жиноят кодексининг 273-моддаси 4-қисми билан жиноят иши қўзғатилиб, тергов ҳаракатлари олиб борилмоқда. Жиноий гуруҳнинг бошқа аъзоларини аниқлаш бўйича тезкор тадбирлар давом этмоқда.
