Тошкент шаҳри Юнусобод туманидаги кўп қаватли уй хонадонлари эшигини очишга уринган эркак 10 суткага қамалди.
Аниқланишича, 1995 йилда туғилган фуқаро маст ҳолатда кўп қаватли уйга кириб, 28 ва 33-хонадонларнинг кириш эшикларини бир неча бор куч ишлатиб очишга уринган. Унинг ушбу ҳаракатлари оқибатида хонадон эгалари қўрқувга тушган, ҳолат жамоат тартибини қўпол равишда бузиш сифатида баҳоланган. Жабрланувчиларнинг кўрсатмаларига кўра, воқеа 19 январь куни тунги соат 00:15–00:20 лар атрофида содир бўлган.
Суд мажлисида Исломжон Тоштемиров айбига иқрор бўлиб, қилган ишидан пушаймон эканини билдирган. У оилавий муаммолар сабабли спиртли ичимлик истеъмол қилганини, содир этган ҳаракатларини тўлиқ эслай олмаслигини айтиб, суддан енгиллик сўраган. Бироқ жабрланувчилар судда унинг ҳаракатлари онгли равишда содир этилганини, уйга ўрнатилган кузатув камераларида эркакнинг ўзини эркин тутгани акс этганини таъкидлаб, унга нисбатан қонуний чора кўришни сўраган.
Суд иш материаллари, жабрланувчиларнинг кўрсатмалари ҳамда фото ва видео далилларни инобатга олиб, Исломжон Тоштемиров Ўзбекистон Маъмурий жавобгарлик тўғрисидаги кодексининг 183-моддаси билан айбдор деб топилди. 2026 йил 22 январь куни суд қарори билан унга 10 сутка маъмурий қамоқ жазоси тайинланди. Мазкур жазо 22 январь куни соат 17:00 дан бошлаб ҳисобланиши белгиланди.
