Эронда мамлакат олий раҳбари Мужтабо Хоманаийнинг беш ой ичидаги илк видеоси эълон қилинди. Бу ҳақда RBK хабар берди.
Видеода Мужтабо Хоманаий бир неча киши қуршовида ўтиргани акс этган. Тасвир қачон олингани аниқлаштирилмаган.
Мужтабо Хоманаий жорий йилнинг март ойи бошида, отаси Али Хоманаий АҚШ ва Исроил зарбалари оқибатида ҳалок бўлганидан сўнг Эроннинг олий раҳбари этиб тайинланган. Унинг қароргоҳига берилган ҳавозарбадан Мужтабо Хоманаий ҳам жароҳатланган ва шундан кейин жамоатчилик олдида кўринмаган.
Аввалроқ, “The Times” нашри Исроилнинг “Моссад” разведка хизмати ва АҚШ Марказий разведка бошқармаси Мужтабо Хоманаийни излаётгани, унинг тирик ёки тирик эмаслигини аниқлашга уринаётгани ҳақида хабар берганди.
Жорий йилнинг май ойида эса “Al Araby” телеканали Эрон ҳукумат йиғилишлари координатори Мазоҳир Ҳусайнийга таяниб, Хоманаийнинг ҳавозарба оқибатида олган жароҳатлари деярли битганини билдирган. Унинг сўзларига кўра, портлаш тўлқини оқибатида Мужтабо Хоманаий тиззаси ва белидан жароҳат олган, қулоғи ортида эса кичик кесик пайдо бўлган.
“The New York Times” нашри жорий йилнинг апрель ойида Хоманаий қароргоҳга берилган зарбадан сўнг бир оёғидан уч марта операция қилингани ва унга протез ўрнатилиши режалаштирилаётганини ёзган эди.
