Коррупцияга қарши курашиш агентлиги томонидан “Сурхондарё Қурилиш Инвест” ДМ буюртмаси асосида ўтказилган давлат харидида қонунбузилиш ҳолати аниқланди.
Қайд этилишича, давлат муассасаси томонидан Бойсун туманидаги “Ҳонгаронсой” сел сув омборидан насос станцияси ва сув узатиш қувурларини қуриш орқали экин майдонларининг сув таъминотини яхшилаш бўйича бошланғич нархи 38,5 миллиард сўмлик тендер эълон қилинган.
Харид комиссиясининг баённомасида ушбу давлат харидида 36,5 миллиард сўмлик таклиф билан “Д.Й.Т.” МЧЖ танлов ғолиби, 38,5 миллиард сўмлик таклиф билан “М.И.Т.” ХК захирадаги ғолиб деб топилган.
Шунга қарамасдан, тендернинг яна бир иштирокчиси — “Ф.” МЧЖнинг солиқ ҳисоб варағига ноқонуний аралашув йўли билан солиқдан қарздорлик мавжудлиги ҳақида сохта маълумот киритилгани фош бўлди. Натижада у “Шаффоф қурилиш” махсус ахборот платформаси орқали тендер жараёнидан асоссиз равишда четлаштирилган.
Ушбу харид бекор қилиниб, ҳолат юзасидан тўпланган ҳужжатлар асосида ҳозирда тегишли органлар томонидан ҳуқуқий баҳо берилаётгани билдирилди.
