Тошкентда бир ойда автобусларда йўл ҳақини тўламасдан ҳаракатланганларга нисбатан нечта жарима расмийлаштирилгани маълум қилинди. Бу ҳақда Транспорт вазирлиги хабар қилди.
Қайд этилишича, 2026-йилнинг январь ойида автобусларда чиптасиз юрган йўловчиларга нисбатан Маъмурий жавобгарлик тўғрисидаги кодексининг тегишли моддасига асосан 11 502 та маъмурий баённома расмийлаштирилиб, жарималар қўлланган.
Жарима миқдори
Рейдларда аниқланган ҳуқуқбузарларнинг ҳар бирига БҲМнинг ўндан бир қисми, яъни 41 200 сўм миқдорида жарима тайинланган.
Ўтган йилнинг 11 ойида Тошкентда шу турдаги 19 632 та қоидабузарлик ҳолати аниқланиб, йўл ҳақини тўламасдан ҳаракатланган йўловчиларга жарималар белгиланганди.
Пойтахт автобусларида 2025 йил 1 январдан бошлаб нақд пул қабул қилиш тўхтатилган.
“Агар йўловчи йўл ҳақини нақд кўринишда таклиф қиладиган бўлса, ҳайдовчи қабул қилмаслиги керак. Вазият Транспорт инспекциясининг ҳудудий инспекторлари томонидан назорат қилинади. Биринчи сафар огоҳлантириш берилади. Огоҳлантиришга қарамасдан ҳуқуқбузарлик такрорланадиган бўлса, ўрнатилган тартибда ҳайдовчига ҳам йўловчига ҳам маъмурий баённома расмийлаштиришга тўғри келади”, деганди Транспорт назорати инспекцияси Тошкент шаҳар ҳудудий бўлими инспектори Салимжон Нишонбоев.
