Футбол бўйича беш карра “Олтин тўп”нинг соҳиби Криштиану Роналду “Ан-Насср” сафида Саудия Арабистони чемпионатидаги ғалабаси эвазига профессионал фаолиятидаги 35-совринни қўлга киритди.
Роналдунинг илк титули 2002 йилда, футболчининг “Спортинг” таркибидаги дебют мавсумида қўлга киритилган Португалия Суперкубоги бўлган эди. Кейинчалик ҳужумчи Англиянинг “Манчестер Юнайтед” жамоаси билан 9 та, Испаниянинг “Реал Мадрид” клуби билан 15 та ва Италиянинг “Ювентус”i билан 5 та совринга эга чиқди. Футболчи “Ан-Насср”га 2022 йилнинг декабрида келиб қўшилган, шу вақтга қадар фақатгина Араб чемпионлари кубогида (2023) ғолиб чиқишга улгурган эди.
Роналду футбол, миллий терма жамоалар, Европа чемпионатлари ва Европанинг бош клублар турнири бўлмиш Чемпионлар Лигаси тарихидаги энг яхши тўпурар ҳисобланади (у ушбу турнирда жами беш бор зафар қучган). Португалия терма жамоаси таркибида эса форвард Европа чемпионати (2016) ва Миллатлар Лигаси (2019, 2025) ғолибига айланган.
Аввалроқ 41 ёшли Роналду 2026 йилги Жаҳон чемпионати учун Португалия терма жамоасининг якуний таркибига киритилгани ҳақида хабар берилган эди. Бу ушбу ўйинчи учун фаолиятидаги олтинчи мундиал бўлади.
