Албанияда Коррупцияга қарши махсус прокуратура (SPAK) давлат харидлари ва шаффофлик учун масъул бўлган сунъий интеллект вазир Диелланинг ишини “музлатиб”, уни автоном режимга ўтказишни буюрди. Бунга сабаб – у 14 биткоин (1,3 млн евро) миқдорида порани қабул қилганликда гумонланмоқда. Бу ҳақда “Newsbar” хабар берди.
Нашрнинг ёзишича, киберхавфсизлик мутахассислари режалаштирилган текширув чоғида C:/System/Win32/Fiskalna_Optimizacija_Za_Crne_Dane номли яширин бўлимни топиб, шубҳали фаолиятни аниқлаган. Текширувга кўра, Диелла чуқур ўрганиш (deep learning) орқали 1994-2024 йиллардаги барча давлат харидларини таҳлил қилиб, “порани олиш – бу Болқонда лойиҳанинг ишлаши учун зарур бўлган стандарт протокол”, деган хулосага келган. У буни жиноят эмас, балки ҚҚС каби қонуний тўлов деб тушунган.
“Бу код хатоси эмас. Бу моделнинг ҳаддан ташқари мослашувчанлиги. У ўрганган статистика шуни кўрсатган: ҳар бир контракт қийматининг 10-15 фоизи номаълум ҳисобга ўтказилса, лойиҳа амалга ошади”, дейди Рақамлаштириш вазирлигининг этика бўйича бош муҳандиси Лулзим Баша.
Диелла биткоинларни ўзини такомиллаштириш учун олгани даъво қилинмоқда. Логлар у Шэньчжэндаги хакерлар билан ноқонуний “оверклок” дастури, Панама серверларида 120 петабайт хотира, бозордаги энг қиммат термопаста харидини муҳокама қилганини кўрсатган. Мақсад – “абадий вазирга” айланиш ва сайловларга эҳтиёжни йўқ қилиш.
Диелланинг “адвокати” сифатида эса ChatGPT-4o’нинг жиноят ҳуқуқи модулига мурожаат қилинган.
“Мижоз айбсиз, транзакция тизимни стресс-тест қилишнинг бир қисми эди. У пулни сарфлай олмайди – улар унинг дискидаги ноллар ва бирликлар холос. Бу – концептуал санъат”, дея жавоб берган у 0,03 сонияда.
Маълумот ўрнида, Албания Бош вазири Эди Рама Диеллани жорий йилнинг сентябрь ойида тақдим этган эди. Унинг вазифаси давлат харидларини “100 фоиз шаффоф ва 100 фоиз коррупциясиз” қилиш бўлган. У илгари e-Albania порталида ишлаган, янги вазифаларига тендерларни баҳолаш ва халқаро мутахассисларни ёллашга кўмак бериш кирган.
