Transfermarkt портали Осиё қитъасининг энг қиммат футбол лигалари рейтингини эълон қилди. Ўзбекистон Суперлигаси ушбу рейтингнинг 10-поғонасидан жой олди. Чемпионатнинг умумий қиймати 87,1 миллион еврога баҳоланган. Бу Марказий Осиёдаги қиммат лига ҳисобланади.
Саудия Пролиагаси Осиёнинг энг қиммат лигаси бўлиб, унинг умумий қиймати 1,14 млрд еврога тенг. Қатар юлдузлар лигаси эса иккинчи поғонадан жой олган — 405,6 миллион евро. Бирлашган Араб Амирликлар Пролигаси (346,97 миллион евро) кучли учликни якунлаган. Умуман олганда, Саудия лигасининг умумий қиймати кейинги ўринларни эгаллаб турган 3 та лига — Қатар, БАА ва Япония чемпионатларининг умумий нархидан ҳам қимматроқ.
Қатар (49% легионер) ва БАА (54,2% легионер) эса топ-5 лигалар ичида энг кўп чет эллик футболчилар хизматидан фойдаланадиган чемпионат ҳисобланади. Япония J1 Лигасида 709 нафар футболчи бор. Бу Осиёдаги энг юқори кўрсаткич. Шу билан бирга, Япония чемпионатида легионерлар фоизи жуда паст (14,2%). Ўзбекистон Суперлигасида эса бу кўрсаткич 16,2 фоизни ташкил қилади.
Аввал Хитой чемпионати дунёнинг энг қиммат 10 та лигасидан бири сифатида эътироф этилган бўлса-да, ҳозирда уларнинг қиймати 139 млн еврога баҳоланган. Хитойда легионерлар фоизи паст (19,4%), бу маҳаллий футболчиларга кўпроқ эътибор қаратилаётганини кўрсатади.
Осиё минтақасининг энг қиммат футбол лигалари рўйхати (топ-10)
- Саудия Пролигаси — 18 клуб, 487 футболчи, ўртача ёш 27,1, легионерлар 37,8%, қиймати 1,14 млрд евро.
- Қатар Юлдузлар лигаси — 12 клуб, 355 футболчи, ўртача ёш 27,8, легионерлар 49%, қиймати 405,65 млн евро.
- БАА Пролигаси — 14 клуб, 415 футболчи, ўртача ёш 26,5, легионерлар 54,2%, қиймати 346,97 млн евро.
- Япония J1 Лигаси — 20 клуб, 709 футболчи, легионерлар 14,2%, ўртача ёш 26,8, қиймати 302,38 млн евро.
- Хитой Суперлигаси — 16 клуб, 501 футболчи, легионерлар 19,4%, ўртача ёш 27,7, қиймати 139,04 млн евро.
- Эрон Пролигаси — 16 клуб, 496 футболчи, легионерлар 8,1%, ўртача ёш 26,3, қиймати 135,10 млн евро.
- Жанубий Корея K Лигаси — 12 клуб, 461 футболчи, легионерлар 11,9%, ўртача ёш 26,4, қиймати 134,25 млн евро.
- Ироқ Юлдузлар лигаси — 20 клуб, 533 футболчи, легионерлар 24,4%, қиймати 92,81 млн евро.
- Австралия А-лигаси — 12 клуб, 343 футболчи, ўртача ёш 24,4, қиймати 87,33 млн евро.
- Ўзбекистон Суперлигаси — 16 клуб, 432 футболчи, легионерлар 16,2%, қиймати 87,01 млн евро.
