Бугун, 18 ноябрь куни Ўзбекистон миллий терма жамоаси БААнинг Ал-Айн шаҳрида бўлаётган халқаро ўртоқлик турнирининг финалида Эронга қарши баҳс олиб боради. Учрашув “Ҳазза бин Зайд” стадионида Тошкент вақти билан соат 21:00 да старт олади.
Фабио Каннаваро бошчилигидаги Ўзбекистон терма жамоаси жорий йилнинг 14 ноябрь куни Муҳаммад Салоҳ етакчилигидаги Миср терма жамоасини 2:0 ҳисобида мағлубиятга учратиб, финалга йўл олган бўлса, Эрон Кабо-Вердени пенальтилар сериясида мағлуб этиб, финалга етиб келган эди.
Шу кунга қадар бу жамоалар ўзаро 18 марта баҳс олиб борган. Учрашувларнинг 11 тасида Эрон, 2 тасида Ўзбекистон ғалаба қозонган, яна 5 та ўйин дуранг билан якунланган. Жамоалар ўртасидаги илк учрашув 1998 йилги Осиё ўйинлари доирасида бўлиб ўтган ва унда Эрон 4:0 ҳисобида зафар қучган эди. Терма жамоаларнинг энг сўнгги ўзаро баҳси эса жорий йилнинг сентябрь ойида Тошкентда бўлиб ўтган CAFA кубоги финалида кузатилган. Мазкур баҳсда Ўзбекистон миллий терма жамоаси 1:0 ҳисобида ғалаба қозонган эди.
Турнирнинг 3-ўрин учун кечган баҳсида Миср Кабо-Верде устидан пеналтилар сериясида ғалаба қозонди.
