Покистон кучлари Афғонистоннинг Хост вилоятидаги фуқаронинг уйини бомбардимон қилиши оқибатида камида 9 нафар бола ва бир аёл ҳалок бўлди. Бу ҳақда “Толибон” ҳаракати вакили Забиҳуллоҳ Мужоҳид маълум қилди.
Унинг сўзларига кўра, Покистон кучлари Кунар ва Пактика вилоятларида ҳам ҳужумни амалга оширган. Бу ҳужумларда жами тўрт нафар тинч аҳоли вакили жароҳатланган.
“24 ноябрь куни кечқурун соат 12 да Хост вилоятининг Гербзво туманида Покистон кучлари маҳаллий фуқаро Уилаят Хоннинг уйини бомбардимон қилди. Оқибатда 9 нафар бола (5 ўғил ва 4 қиз) ҳамда бир аёл ҳалок бўлди, уларнинг уйи бутунлай вайрон қилинди.
Афғонистон Ислом Амирлиги ушбу тажовузкор ҳаракатни кескин қоралаб, ўз ҳудуди ва фуқароларини ҳимоя қилиш қонуний ҳуқуқи эканини таъкидлайди. Керакли жавоб ўз вақтида қайтарилади”, деди Мужоҳид.
Авиаҳужум Покистоннинг Пешовар шаҳрида содир бўлган худкушлик ҳужумидан бир кун ўтиб амалга оширилди. Мазкур портлаш оқибатида уч нафар ҳарбий ҳалок бўлган эди.
