Афғонистонда кучли бўрон ва ёғингарчилик оқибатида камида 9 нафар бола ҳалок бўлди. Бу ҳақда расмийларга таяниб, France24 хабар берди.
Қурбонларнинг аксарияти Қандаҳор вилоятида қайд этилган, бир нечта туманларга катта моддий зарар етган. Кучли бўрон оқибатида уйлар ҳам зарар кўрган.
Шарқий Нуристон вилоятида 21 январь куни кучли ёғингарчилик туфайли кўчки қайд этилган. Оқибатда Қураиш қишлоғида бир оиланинг уч нафар аъзоси ҳалок бўлган, яна икки киши жароҳат олган.
“Икки нафар 10 ёшли қиз ва бир ўсмир ҳалок бўлди”, деди Нуристон вилояти ҳукумати матбуот котиби Фраидун Самим.
Сўнгги 24 соат ичида мамлакат марказидаги Ғазни вилоятида тахминан 80 сантиметр қор ёғган. Бунинг оқибатида бозорлар ёпилган, йўллар тўсилиб қолган. Афғонистоннинг кўплаб вилоятларида, жумладан, пойтахт Кобулда ҳам кучли қор ёғиши йўл-транспорт ҳодисаларига сабаб бўлган.
