Бразилиялик ҳужумчи Неймарнинг отасига тегишли NR Sports компанияси афсонавий футболчи Пеле брендининг эгалик ҳуқуқларини 18 миллион долларга сотиб олди. Бу ҳақда UOL нашри хабар берди.
Манбанинг ёзишича, битим орқали NR Sports Пелега оид тасвирлар, тарихий архивлар ва тижорий ҳуқуқларни қўлга киритган. Келишув ҳақида расман 19 ноябрь куни эълон қилиниши кутилмоқда.
Неймар “Сантос”га қайтгач, NR Sports унинг бренди устида ишлаб чиқилган стратегияни аста-секин Пеле билан боғлай бошлади. Масалан, реклама ва медиа материалларида Неймарни “Шаҳзода” деб аташди — бу эса клубнинг абадий рамзи бўлган “Қирол” Пеленинг номига ишора эди.
Бундан ташқари, компания Пеленинг “Сантос”нинг уй стадионидаги VIP-хонасини ҳам таъмирлаб берди. Ҳозир бу хона афсонавий ҳужумчининг оиласи томонидан фойдаланилади. Таъмирлаш ишлари доирасида барча ўриндиқлар алмаштирилган, янги ҳожатхона қурилган, ойнаванд қоплама ўрнатилган ва кондиционер қўйилган. Харажатларнинг барчаси NR Sports томонидан қопланган.
Эслатиб ўтамиз, Пеле Бразилия терма жамоаси билан уч карра Жаҳон чемпиони бўлган. У фаолиятининг катта қисмини “Сантос”да ўтказган, 1975—1977-йилларда эса АҚШнинг “Нью Йорк Космос” жамоасида тўп сурган. Афсонавий футболчи 2022 йил 82 ёшида вафот этган.
Неймар ҳам “Сантос” тарбияланувчиси бўлиб, кейинчалик “Барселона”, “ПСЖ” ва “Ал-Ҳилол” сафида фаолиятини давом эттирган. 2025-йилнинг бошида Саудия Арабистони клуби билан шартномасини бекор қилиб, “Сантос”га қайтган эди.
