АҚШнинг Флорида штатида истиқомат қилувчи Мелисса Симс собиқ севгилиси томонидан сунъий интеллект ёрдамида сохталаштирилган далиллар оқибатида икки кун қамоқда ўтиришга мажбур бўлди. Унинг сўзларига кўра, эркак гўёки аёл томонидан юборилгандек кўрсатилган, ҳақорат ва таҳдидларни ўз ичига олган сохта матнли хабарларни яратган.
Воқеа 2024 йил ноябрь ойида бошланган. Ўшанда Мелисса Симс жанжал вақтида полицияга мурожаат қилиб, собиқ севгилиси унинг уйини вайрон қилгани ва унга жисмоний зарар етказганини билдирган. Ҳодиса жойига етиб келган ҳуқуқ-тартибот ходимлари эса аксинча, Симсни “дўппослаш”да айблаб, уни ҳибсга олган. Кейинчалик у гаров пули эвазига озодликка чиқарилган ва суд қарорига кўра, айбловчи томон билан алоқада бўлиши қатъиян тақиқланган.
Бироқ орадан бир неча ой ўтгач, судга сунъий интеллект ёрдамида яратилган, Симс номидан ёзилгандек кўрсатилган ёзишмалар тақдим этилди. Унда Мелисса гўёки эркакка таҳдидлар қилган эди. Ушбу хабарлар суд қарорини бузганлик сифатида баҳоланиб, аёл қайта ҳибсга олинди. “Ҳеч ким далилларни текширмади”, деди Симс.
Колумбия округи Олий суди катта судьяси Герберт Диксоннинг таъкидлашича, дипфейклар — яъни сохта аудио, видео ва матн материаллари билан боғлиқ ҳолатлар сўнгги пайтларда тобора кўпайиб бормоқда. Дрексел университетининг сунъий интеллект асосидаги криминалистика бўйича мутахассиси, профессор Роб Д’Овидио сўзларига кўра, қалбакилаштирилган материалларни аниқлашга мўлжалланган замонавий воситалар технологияларнинг ривожланиш даражасига ета олмаяпти.
Ҳозирги сунъий интеллект асосидаги тасвирлар билан ўтказилган синов натижалари бунга яққол мисол бўла олади. Мазкур тестда турли дастурлар томонидан сохталаштириш эҳтимоли 1 фоиздан 62 фоизгача баҳоланган.
“Энди биз кўраётган ёки ўқиётган нарсаларимизга тўлиқ ишониб бўлмаяпти”, дея хулоса қилди профессор.
Саккиз ой давом этган суд жараёнлари ва адвокатнинг фаол саъй-ҳаракатларидан сўнг, Мелисса Симсга қўйилган барча айбловлар бекор қилинди. Ўтган ойда аёл тўлиқ оқланди. Эндиликда Симс суд жараёнларида сунъий интеллект асосида яратилган далиллардан фойдаланишни қатъий тартибга солувчи қонунларни жорий этиш тарафдори сифатида чиқишлар қилмоқда.
