Украина президенти Владимир Зеленский АҚШга мурожаат қилиб, Чеченистон раҳбари Рамзан Қодировни ҳам Венесуэла президенти каби қўлга олишга чақирган эди. Қодиров мазкур чақириқ ортидан ўзининг Telegram каналида Зеленскийга жавоб қайтарди.
“Масхарабоз АҚШ ҳукуматига мени ўғирлашни таклиф қилмоқда. Эътибор беринг, эркак кишига ўхшаб, ҳатто ўзим қиламан, деб дўқ ҳам қилмади. Бундай фикрни хаёлига ҳам келтирмади. Зеленский қўрқоқларча ўзини четга олиб, хавфсиз масофадан туриб, уни хафа қилган даҳшатли ‘амакиси’ Рамзан Қодировни бошқалар қандай жазолашини кузатишга қарши эмаслигини билдирди.
Бу шайтон нималарни қилиб кўрмади: мени қидирувга берди, санкциялар киритди. Энди америкаликларга ёлвориб, қурол-яроғ билан ёрдам бермадингиз, ҳеч бўлмаса Рамзанни ўғирлаб кетинг, демоқда”, деб ёзди Қодиров.
Украина президентининг фикрича, Америка махсус хизматларининг бундай қадами Россия президентини урушни тугатиш бўйича тинчлик шартномасига рози бўлишга мажбурлайдиган аргумент бўлиши мумкин.
“Биз яхши натижаларга эришдик, лекин ҳали ҳамма нарсани охирига етказганимиз йўқ. АҚШ қандай босим ўтказишни билади. Масалан, Мадуро. Операцияни тез амалга оширишдими? Ҳа, тезда бажарилди. Буни бутун дунё кўрди. Келинг, худди шуни, масалан, Қодиров билан ҳам қилайлик. Балки шунда Путин ўйлаб кўрар”, деган эди Зеленский.
Россия эса Мадуро сценарийсини Германия канцлерида синашга чақирди
Россия Хавфсизлик кенгаши раиси ўринбосари Дмитрий Медведев аввалроқ Венесуэладаги воқеалардан сўнг бошқа давлатлар етакчилари, жумладан, Германия канцлери Фридрих Мерсга нисбатан ҳам шундай қўлга олиш операциялари ўтказилиши мумкинлигини айтганди.
“Ўша неонасист Мерснинг ўғирлаб кетилиши бу карнавал сериясидаги ажойиб сюжет бурилиши бўлиши мумкин эди. Ҳайрон қоладиган нарсанинг ўзи қолмади. Ушбу сценарийда ҳам ҳақиқат учқунлари бор. Унинг Германиянинг ўзида ҳам таъқиб қилиниши учун асослар етарли. Шунинг учун бу уятли иш бўлмасди. Айниқса, фуқаролар унинг дастидан бекорга азоб чекаётган бир пайтда”, деган Медведев “ТАСС” агентлигига.
Венесуэла президентининг қўлга олиниши
63 ёшли Николас Мадуро ва унинг рафиқаси Силия Флорес 3 январь куни Венесуэла пойтахти Каракасда АҚШ кучлари томонидан қўлга олинди. Улар шундан сўнг АҚШ Гиёҳвандликка қарши кураш бошқармасининг Нью Йоркдаги штаб-квартирасига етказилди. Мадуро қўлга олинганидан кейин вице-президент Делси Родригес президент вазифасини бажарувчи этиб расман тайинланди. Бироқ Дональд Трамп мамлакатни ҳозирча АҚШ бошқаришини таъкидлади.
5 январь куни Венесуэла собиқ президенти Николас Мадуро суд қилинди. У федерал судда ўзига нисбатан қўйилган наркотерроризм айбловларини тан олмади. Мадуро ва рафиқаси суд залига оёқларида кишан билан, аммо қўллари бўш ҳолда кириб келди. Прокуратура маълумотларига кўра, Мадуро Мексиканинг Синалоа ва Зетас картеллари, Колумбиянинг FARC исёнчилари ва Венесуэланинг Трен де Арагуа жиноий гуруҳи билан ҳамкорликда ишловчи кокаин контрабандаси тармоғига раҳбарлик қилган. Суд якунида судья Мадуронинг ишини 17 март куни қайта кўриб чиқишини маълум қилди.
6 январь куни Трамп АҚШ нефть компанияларини Венесуэлада ишлашга чақирди ва улар учун субсидия ажратилишини айтди. Bloomberg ҳисоб-китобларига кўра, Венесуэла нефть инфратузилмасини реконструкция қилиш 100 млрд долларга тушиши мумкин. Нефть ресурсларини ўзлаштиришда АҚШнинг ExxonMobil, ConocoPhillips ва Chevron компаниялари эҳтимолий иштирокчилар сифатида тилга олинмоқда.
Соҳа таҳлилчилари Reuters билан суҳбатда америкалик ўйинчиларнинг Венесуэлага қайтишига маҳаллий инфратузилма етишмаслиги ва эскириши, шунингдек, мамлакатнинг сиёсий келажаги бўйича ноаниқлик тўсқинлик қилишини айтмоқда. Бундан ташқари, америкаликларнинг Венесуэладаги бундай иштироки учун ҳуқуқий асос ва АҚШ ҳарбий операциясидан кейинги сиёсати ноаниқлигича қолмоқда.
