Бухоро вилоятида “Яшил макон” умуммиллий лойиҳаси доирасида экилган дарахт кўчатларининг ҳолатини ўрганиш бўйича ўтказилган рейдлар давомида бир қатор қонунбузарликлар аниқланган. Бу ҳақда вилоят Экология, атроф-муҳитни муҳофаза қилиш ва иқлим ўзгариши бошқармаси хабар берди.
Маълум қилинишича, туман ва шаҳар ҳудудларида 2025 йилнинг ўтган 10 ойи давомида кузги ва баҳорги мавсумларда экилган кўчатларга етарли парвариш кўрсатилмагани, суғориш ишларининг ўз вақтида олиб борилмагани аниқланган. Натижада жами 82 та ҳуқуқбузарлик ҳолати қайд этилди.
Ушбу қонунбузарликлар юзасидан масъул мансабдор шахсларга Маъмурий жавобгарлик тўғрисидаги кодексининг 79 моддаси 4 қисми билан жами 313 миллион сўм миқдорида жарима қўлланилган.
Бухоро вилояти Экология бошқармаси матбуот хизматининг маълумотига кўра, мазкур чоралар “Яшил макон” лойиҳаси доирасида экилган кўчатларнинг сақланиши ва парваришини таъминлаш мақсадида амалга оширилган.
