АҚШ БМТ Хавфсизлик кенгашига Сурия президенти Аҳмад аш-Шараъага нисбатан санкцияларни бекор қилишни таклиф қилувчи резолюция лойиҳасини тақдим этди. Бу ҳақда Reuters хабар берди.
Аш-Шараъа 10 ноябрь куни АҚШ президенти Дональд Трамп билан Оқ уйда учрашиши кутилмоқда. Reuters хабарига кўра, тақдим этилган резолюцияда Сурия ички ишлар вазири Анас Хаттобга қўйилган санкцияларни ҳам бекор қилиш таклиф этилган.
Ҳозирча резолюция овозга қўйиладиган сана маълум эмас. Ҳужжат қабул қилиниши учун камида 9та мамлакат “ҳа” деб овоз бериши ва Россия, Хитой, АҚШ, Франция ёки Британия томонидан вето бўлмаслиги керак.
Вашингтон бир неча ойдан бери 15 аъзодан иборат Хавфсизлик кенгашини Сурияга нисбатан санкцияларни юмшатишга чақириб келмоқда. 13 йиллик фуқаролар урушидан сўнг, Сурия президенти Башар Асад 2024 йил декабрь ойида “Ҳаёт Таҳрир аш-Шом (ҲТС) бошчилигидаги қуролли мухолифат томонидан ҳокимиятдан четлатилганди.
ҲТС аввал “Нусра фронти” номи билан танилган ва 2016 йилгача “Ал-Қоида”нинг Суриядаги расмий қаноти бўлган. 2014 йилдан буён гуруҳ БМТнинг “Ал-Қоида” ва “ИШИД” рўйхатида турибди. ҲТС раҳбарларининг айримлари, жумладан Аш-Шараъа ва Хаттоб, саёҳат тақиқи, активларни музлатиш ва қурол эмбаргоси каби санкциялар остида.
БМТнинг махсус қўмитаси 2025 йил давомида Аш-Шараъага бир неча бор сафар қилишга рухсат берган. Шу боис, агар АҚШ таклиф қилган резолюция 10 ноябргача қабул қилинмаса ҳам, Сурия президенти Оқ уйга ташриф буюриши эҳтимолдан холи эмас.
Трамп май ойида АҚШнинг Сурияга нисбатан санкциялар сиёсатини ўзгартиришини айтганди. БМТ кузатувчилари июль ойидаги ҳисоботда ҲТС ва “Ал-Қоида” ўртасида фаол алоқалар мавжуд эмаслигини қайд этган.
