Каталония миллий терма жамоаси жорий йилнинг 18 ноябрь куни Фаластин терма жамоасига қарши хайрия мақсадидаги ўртоқлик учрашуви ўтказишини маълум қилди. Ўйин Барселонадаги “Монжуик” стадионида бўлиб ўтади. Бу ҳақда “Mundo deportivo” нашри хабар берди.
Каталония футбол федерацияси (FCF) маълум қилишича, учрашувдан тушган барча маблағ Фаластин халқига ёрдам кўрсатиш учун сарфланади. Маблағлар инсонпарварлик ёрдами, Ғазони қайта тиклаш ва маданий бирдамликни қўллаб-қувватлаш каби йўналишларга йўналтирилади.
Ушбу ўртоқлик учрашуви FCF, Каталония ҳукумати, Барселона вилоят кенгаши, Барселона шаҳар ҳокимлиги, Ciutats de Palestine ҳамда Act X Palestine ташкилоти билан ҳамкорликда ўтказилади.
Маълумот учун, Каталония терма жамоаси Испаниянинг Каталония минтақасидаги футбол терма жамоаси бўлиб, FIFA ва UEFA аъзоси эмас. Шу сабабли жамоа расмий халқаро мусобақаларда иштирок эта олмайди, аммо терма жамоа норасмий бўлса-да тез тез ўртоқлик учрашувларини ташкил қилиб келади.
