Хитойда 27 ноябрь куни синовдан ўтказилаётган поезд темир йўл ишчиларини босиб кетди. Бу ҳақда South China Morning Post хабар берди.
Маълум қилинишича, ҳодиса Юннан провинциясининг Кунмин шаҳрида содир бўлган. Оқибатда 11 киши ҳалок бўлган, икки киши жароҳатланган.
Сейсмик ускуналарни синовдан ўтказаётган 55537-сонли поезд “Лоянчжен” станцияси ҳудудидаги бурилишдан ўтаётганда йўлга чиқиб қолган ишчиларни уриб юборган, дейилади бошқарманинг Weibo ижтимоий тармоғидаги расмий аккаунтида.
Авариядан сўнг, темир йўл бошқармаси зудлик билан фавқулодда вазиятлар режасини ишга туширган. Маҳаллий ҳокимият органлари билан биргаликда қутқарув ишлари ташкил этилган. Айни пайтда “Лоянчжен” станциясида транспорт ҳаракати тикланган, жабрланганларга тиббий ёрдам кўрсатилмоқда. Тегишли идоралар авария сабабларини аниқлаш учун тергов бошлади.
Хитой темир йўл тармоғи дунёдаги энг йириги бўлиб, унинг умумий узунлиги 160 минг километрдан ошади ва ҳар йили миллиардлаб йўловчи сафарларига хизмат кўрсатади. Самарадорлиги учун юқори баҳоланса-да, тизим бир қатор шов-шувли ҳодисалардан сўнг танқид остида қолган. Жумладан, 2011 йилда шарқий Чжецзян провинциясида юз берган ҳалокатда 40 киши ҳалок бўлиб, 200 нафари жароҳатланган. Шунингдек, 2021 йилда шимоли-ғарбдаги Гансу вилоятида поезд темир йўл ишчиларини босиб кетиши оқибатида 9 киши вафот этган.
