АҚШ расмийлари Атлантика океани бўйлаб икки ҳафтадан ортиқ давом этган таъқибдан сўнг Венесуэлага алоқадор ва Россия байроғи остида ҳаракатланаётган нефть танкерини қўлга олишга киришди. Бу ҳақда Reuters хабар берди.
Россия билан зиддият хавфи
Ушбу операция Россия билан муносабатларнинг янада таранглашишига сабаб бўлиши мумкинлиги айтилмоқда. Дастлаб “Белла-1” номи билан танилган танкер АҚШнинг санкция остидаги кемалар учун ўрнатган денгиз блокадасидан ўтишга муваффақ бўлган ва Қўшма Штатлар соҳил хавфсизлиги хизматининг бортга чиқиш ҳақидаги талабларини рад этган.
Исми ошкор этилмаган америкалик расмийнинг сўзларига кўра, операция соҳил хавфсизлиги хизмати ва АҚШ ҳарбийлари томонидан амалга оширилмоқда. Операция ўтказилаётган ҳудуд яқинида Россия ҳарбий кемалари, жумладан, сув ости кемаси ҳам мавжуд бўлган.
Ҳозирда Маринера деб номланган ва Россия байроғи остида рўйхатдан ўтган ушбу кема президент Дональд Трампнинг Венесуэлага қарши босим кампанияси бошланганидан бери АҚШ нишонига тушган навбатдаги танкердир.
The New York Times нашрининг ёзишича, январь ойи бошидан буён Венесуэла қирғоқлари яқинида бир неча кемалар Россия юрисдикциясини қабул қилган. Жумладан, Hyperion ва яна тўртта танкер Россия байроғини кўтарган. Ушбу кемалар Россия реестрига киритилиб, Сочи ва Таганрог портларига бириктирилган.
Блокада давом этмоқда
Бундан ташқари, АҚШ расмийлари Лотин Америкаси сувларида Венесуэлага тегишли яна бир танкерни тўхтатиб қолганини маълум қилди. Вашингтон Венесуэладан келаётган санкция остидаги кемаларга нисбатан денгиз блокадасини қатъий давом эттирмоқда.
