Ўзбекистоннинг Биринчи Президенти Ислом Каримовнинг тўнғич қизи Гулнора Каримованинг Швейцарияда мусодара қилинган пулларидан 43,5 млн доллар тиббиётга йўналтирилди. Бу ҳақда Иқтисодиёт ва молия вазирлиги хабар қилди.
Қайд этилишича, Ўзбекистон ва Швейцария ўртасидаги Реституция битими доирасида амалга оширилган соғлиқни сақлаш соҳасидаги илк қўшма дастур якунланган. Дастур “Ишонч” жамғармаси томонидан молиялаштирилган илк лойиҳа бўлиб, UNICEF, UNFPA ҳамда Жаҳон соғлиқни сақлаш ташкилоти ҳамкорлигида амалга оширилган. Лойиҳа учун 43,5 миллион АҚШ доллари ажратилиб, маблағлар оналик ва болаликни муҳофаза қилиш тизимини ривожлантириш, перинатал хизматлар сифатини ошириш ҳамда тиббиёт муассасаларининг моддий-техник базасини мустаҳкамлашга йўналтирилган.
Дастур доирасида республика бўйлаб 231 та перинатал муассаса замонавий тиббий ускуналар билан жиҳозланган. Бунинг учун 31 миллион доллардан ортиқ маблағ эвазига инкубаторлар, сунъий нафас олдириш аппаратлари, анестезия тизимлари ва бошқа тиббий жиҳозлар харид қилиниб, ҳудудлардаги перинатал марказларга етказиб берилган.
Шунингдек, 80 мингдан ортиқ тиббиёт ходими замонавий перинатал ёрдам, мураккаб ҳомиладорлик ҳолатларини бошқариш, муддатидан олдин туғилган чақалоқларни парваришлаш ҳамда лаборатория диагностикаси бўйича малака оширган. Бундан ташқари, оналик ва янги туғилган чақалоқларга тиббий ёрдам кўрсатишга оид 49 та клиник протокол ишлаб чиқилган ёки янгиланган.
Маълум қилинишича, ҳомиладорлик даврида мунтазам тиббий кузатувнинг аҳамиятини тарғиб этишга қаратилган ахборот кампаниялари орқали 20 миллионга яқин фуқаро қамраб олинган. Натижада 4 миллионга яқин аҳоли сифатли оналик ва перинатал хизматлардан фойдаланиш имкониятига эга бўлган.
Мониторинг натижаларига кўра, олдини олиш мумкин бўлган оналар ўлими улуши 2022 йилдаги 77,3 фоиздан 62,8 фоизгача, яъни 14,5 фоиз бандга камайган. Шунингдек, тана вазни жуда паст бўлган янги туғилган чақалоқларнинг омон қолиш кўрсаткичи дастур бошланганидан буён қарийб 13 фоизга яхшиланган.
Вазирликка кўра, лойиҳа доирасида лаборатория хизматлари салоҳиятини мустаҳкамлаш, коррупциянинг олдини олиш механизмларини жорий этиш ҳамда ҳомиладор аёлларни тиббий кузатув билан тўлиқ қамраб олишга қаратилган тизимли чора-тадбирлар ҳам амалга оширилган.
Маълумот учун, “Ишонч” жамғармаси Швейцарияда мусодара қилинган Гулнора Каримовага алоқадор активларни Ўзбекистонга қайтариш бўйича Реституция битими асосида ташкил этилган. Жамғарма маблағлари соғлиқни сақлаш ва таълим соҳаларидаги ижтимоий лойиҳаларни молиялаштиришга йўналтирилади.
