Қирғизистондан Андижон вилояти орқали трансмиллий жиноий уюшма аъзолари томонидан катта миқдордаги гиёҳвандлик воситаларининг контрабандасига чек қўйилди. Бу ҳақда ИИВ матбуот хизмати хабар берди.
Вазирлик тезкор қидирув департаменти ва унинг ҳудудий бўлинмалари, Давлат хавфсизлик хизмати ва Давлат божхона қўмитаси ходимлари ҳамкорлигида ўтказилган тезкор тадбир натижасида Андижон вилояти Бўстон тумани ҳудудида жойлашган дала майдонига кўмиб кетилган 9 кг 447 г гашиш гиёҳвандлик воситасини олган вақтида 1990, 1996, 1980, 1981-йилларда туғилган уюшган гуруҳ аъзолари тезкор тадбир иштирокчилари томонидан қўлга олинган.
Аниқланишича, трансмиллий жиноий уюшманинг Ўзбекистондаги ташкилотчилардан бўлган шахс Қирғизистонда яшовчи фуқаронинг кўрсатмасига асосан юқоридаги геолокациядан гиёҳвандлик воситаларини олиб, бошқа вилоят ҳудудларига тарқатиши лозим бўлган. Ўтказилган тезкор тадбир натижасида Ўзбекистонда 94 470 та бир марталик дозага тенг бўлган 9 килограмм 447 грамм гашиш гиёҳвандлик воситаси тарқалишининг олди олинган.
Мазкур ҳолат юзасидан ушбу жиноий гуруҳга нисбатан Жиноят кодексининг 273-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш)бешинчи қисмига асосан 10 йилдан 20 йилгача озодликдан маҳрум қилиш жазоси қўлланилиши назарда тутилган.
