Андижонда йигит вилоят йўл ҳаракати хавфсизлиги бошқармасининг расмий саҳифасига жойланган видеолар остига ёзган изоҳи учун суд қилинди.
Ижтимоий тармоқларда Андижон вилояти йўл ҳаракати хавфсизлиги бошқармасининг расмий саҳифасига жойланган видеоларнинг изоҳларида ходимларнинг шаъни ва қадр-қимматини камситувчи изоҳ ёзиб қолдирган фуқарога нисбатан тўпланган ҳужжатлар Пахтаобод тумани жиноят ишлари бўйича судига тақдим этилди. Ушбу ҳужжатларга асосан фуқарога нисбатан етти сутка маъмурий қамоқ жазоси суд органлари томонидан тайинланди.
“Мен Раҳимжонов Зиёвиддин. ГАИ ларнинг комментариясига ҳақоратли сўзлар ёзиб қолдирган эдим. Ҳеч кимга маслаҳат бермайман. Ўзим қилган ишимдан пушаймонман, билмасдан ёзиб қўйибман. Ҳеч кимга, тенгдошларимга ҳеч кимга маслаҳат бермайман, бошқа қайтарилмайди”, дея узр сўради йигит.
Вилоятда бу каби ҳолат июль ойида ҳам кузатилган эди. Талаба йигит Андижон вилояти Йўл ҳаракат хавфсизлиги бошқармасининг расмий саҳифаларига жойланган видеолавҳа изоҳига ходимларнинг шаъни ва қадр-қимматини камситувчи ҳақоратли сўзлар ёзган. Унинг шахси аниқланиб, ички ишлар бўлимига олиб келинган. Содир этилган ҳуқуқбузарлик юзасидан ушбу фуқарога нисбатан Андижон шаҳар бош судьяси томонидан 6 сутка маъмурий қамоқ жазоси белгиланди.
