Рим-католик черкови раҳбари папа Лео ХIV Исо Масиҳнинг туғилган куни муносабати билан бутун дунёда, хусусан, Россия ва Украина ўртасидаги давом этаётган уруш ҳудудида 24 соатлик сулҳ эълон қилишга чақирди. Бу ҳақда Vatican News хабар берди.
“Россиянинг рад жавоби мени чуқур қайғуга солди”
Рим яқинидаги Кастел-Гандолфо қароргоҳида бир ҳафталик танаффусни якунлаб, Ватиканга қайтган понтифик журналистларнинг саволларига жавоб берди. Дунё христианлари нишонлайдиган байрам арафасида ўз мурожаатини йўллар экан, папа Россиянинг Рождество куни ўт очишни тўхтатишдан бош тортганидан афсусда эканини билдирди.
“Мени чуқур қайғуга солаётган масалалардан бири — Россиянинг Рождество сулҳига амал қилишни рад этганидир. Мен яна бир бор барча эзгу ниятли инсонларни Исо туғилган кунида Украинада ва бутун дунёда ҳеч бўлмаганда бир кунлик тинчликка риоя қилишга чақираман”, деди Рим папаси.
Ғазо сектори ва Яқин Шарқдаги вазият
Понтифик, шунингдек, Яқин Шарқдаги вазият, хусусан, Ғазо секторидаги ҳолатга ҳам тўхталиб ўтди. У Қуддуснинг лотин патриархи, кардинал Пьербаттиста Писсабалланинг яқинда ушбу ҳудудга ташриф буюрганини эслатди. Папанинг маълум қилишича, у баёнот беришидан бир соат аввал Ғазо шаҳридаги Муқаддас оила черкови руҳонийси Габриелле Романелли билан телефон орқали мулоқот қилган.
“Вазият ҳамон жуда нозик”
Рим папаси октябрь ойида Ғазо секторида кучга кирган ўт очишни тўхтатиш режасига ҳам муносабат билдирди.
“Улар байрамни ҳамон жуда нозик бўлиб турган вазиятда нишонлашга ҳаракат қилмоқдалар. Умид қиламизки, тинчлик келишувининг амалга оширилиши муваффақиятли давом этади”, дея қўшимча қилди понтифик.
