Германия Ташқи ишлар вазирлиги ўз фуқароларини Эрон ҳудудини дарҳол тарк этишга чақирди. Тегишли огоҳлантириш вазирликнинг расмий веб сайтида эълон қилинди.
Вазирлик баёнотида Германиянинг Теҳрондаги элчихонаси ҳозирда Германия фуқароларига жуда чекланган консуллик ёрдамини кўрсатиши мумкинлиги, шунинг учун улар ўз хавфсизлигини таъминлаш учун Эрон Ислом Республикасини тарк этиши кераклиги таъкидланган.
“Эронга сафар қилиш тавсия этилмайди. Германия фуқароларига Эронни тарк этиш қатъий тавсия қилинади. Шуни инобатга олингки, хориждаги масъул дипломатик ваколатхона фақат чекланган консуллик ёрдамини кўрсатиши мумкин. Айниқса, агар сиз мамлакатга киришда Эрон паспортидан фойдаланган бўлсангиз, бу ҳолат долзарбдир”, дейилади баёнотда.
Мазкур огоҳлантириш АҚШ президенти Дональд Трамп Теҳронни ядровий дастур бўйича янги келишувга мажбурлаш мақсадида Эроннинг ҳарбий ва ҳукумат объектларига “чекланган” зарба бериш имкониятини кўриб чиқаётгани ҳақидаги баёнотидан сўнг эълон қилинди.
Вашингтондаги манбаларга кўра, агар бундай зарбадан кейин ҳам Эрон расмийлари АҚШ талабларига риоя қилмаса ва уранни бойитишни тўхтатмаса, кенг кўламли ҳарбий кампания бошланиши эҳтимоли бор.
