БАА ўз ҳудудида Эронга тегишли миллиардлаб долларлик активларни музлатиш масаласини кўриб чиқмоқда. Агар бу қарор қабул қилинса, Теҳрон энг муҳим иқтисодий манбалардан биридан маҳрум бўлиши мумкин. Бу ҳақда The Wall Street Journal хабар берди.
БАА узоқ йиллардан бери Эрон учун ташқи дунё билан савдо қилиш ва чет эл валютасига чиқиш имконини берувчи асосий молиявий “дарвоза” бўлиб келган. Активларнинг музлатилиши эса Эрон иқтисодиётини янада қийин аҳволга солиши мумкин.
Манбаларга кўра, БАА расмийлари Теҳронни ҳужумлар учун эҳтимолий чоралар ҳақида огоҳлантирган. Эрон Ғарб санкцияларини айланиб ўтиш, нефтни сотиш ва тушган даромадни қурол-яроғ дастурларига йўналтириш учун БААнинг молиявий тизимидан фойдаланиб келган.
“БАА расмийлари Эрон билан боғлиқ ноқонуний молиявий фаолиятга қарши бир нечта чораларни кўриб чиқмоқда”, деди вазиятдан хабардор амалдорлар.
Бу чоралар савдони ниқоблаш учун очилган сохта компаниялар ҳисобларини музлатиш ва банк тизимидан ташқарида пул ўтказмаларини амалга оширувчи тармоқлар устидан қатъий назорат ўрнатишни ўз ичига олади.
Агар БАА Эроннинг яширин молиявий тизимига зарба берса, асосий нишонлардан бири Ислом инқилоби қўриқчилари корпуси билан боғлиқ ҳисоблар бўлиши мумкин.
“Айрим сиёсатчилар Эрон кемаларини қўлга олиш каби тўғридан тўғри денгиз чораларини ҳам кўриб чиқмоқда”, деди манба.
Бу БАА портлари ва денгиз йўллари орқали фаолият юритаётган Эроннинг яширин нефть танкерлар тармоғини издан чиқаришга қаратилган бўлади.
