Эроннинг сўнгги шоҳи Муҳаммад Ризо Паҳлавийнинг ўғли ва мухолифат вакили Ризо Паҳлавий Германияда ҳужумга учради. Бу ҳақда “Deutsche Welle” хабар берди.
Ҳодиса 23 апрель куни Берлин ҳукумат кварталида юз берган. Ризо Паҳлавий Федерал матбуот анжумани биносидан чиқиб кўчага чиққанида, орқадан келган эркак унинг устига суюқлик сепган. Шундан сўнг ҳужумчи ерга ётқизилиб, полиция томонидан қўлга олинган. Ҳужум сабаблари ҳозирча маълум қилинмаган.
Паҳлавийнинг матбуот хизмати ижтимоий тармоқларда берган баёнотида у ҳодисадан зарар кўрмаганини ва Берлин сафарини ўзгаришсиз давом эттирганини билдирган. У Германия Бундестагининг ташқи ишлар қўмитаси раиси билан учрашган, парламентдаги турли сиёсий кучлар иштирокидаги давра суҳбатида қатнашган, минглаб эронликлар йиғилган митингда нутқ сўзлаган, ёш депутатлар билан учрашган, оммавий ахборот воситаларига интервьюлар берган ҳамда Эрон диаспораси вакиллари билан мулоқот қилган.
Унинг вакиллари Паҳлавий эътибор Эрон халқининг оғир аҳволига қаратилишини истаётганини таъкидлаган. Уларнинг айтишича, мамлакатда одамлар ҳар куни қатл, қотиллик, қийноқлар ва зўравонлик ҳолатларига дуч келмоқда. Шунингдек, улар Берлин полициясига кўрсатилган ёрдам учун миннатдорлик билдирган.
Матбуот анжуманида Ризо Паҳлавий Европа давлатларини Эрон ҳукуматига ён бермасликка чақирган. Унга кўра, бу режим билан келишув орқали тинчликка эришиш мумкин деган фикр хато ва бундай тизим сақланиб қолса ҳам барқарорлик бўлмайди.
Паҳлавий, шунингдек, ўзгаришлар муқаррар эканини билдириб, асосий савол бу жараёнда қанча эронлик ҳалок бўлишида эканини таъкидлаган. Унинг сўзларига кўра, фақат сўнгги икки ҳафта ичида мамлакатда 19 нафар сиёсий маҳбус қатл этилган.
