Жорий йилнинг 29 апрель куни АҚШнинг Кентукки штатидаги банк ўғирлигида икки ходим отиб ўлдирилди. Гумонланувчи қидирилмоқда. Бу ҳақда ABC News хабар берди.
Қайд этилишича, гумондор маҳаллий вақт билан соат 14:00 атрофида Береа шаҳридаги Честнат кўчасида жойлашган АҚШ банкига кириб, икки ходимни отиб ташлаган, сўнг қочиб кетган.
“Биз Береа ва Мэдисон округи фуқароларини тушунамиз, улар ҳозир қўрқишади ва биз улар учун қўрқамиз. Биз бу одамни топиш ва уни жавобгарликка тортиш учун қўлимиздан келганини қиламиз”, дейди Кентукки штати полицияси ходими Скотт Пеннингтон.
Штат полициясининг маълумотларига кўра, гумондорнинг бўйи тахминан 1,90 см, оч рангли свитер, тўқ рангли қўлқоп, кулранг шим ва оч рангли спорт пойабзали кийиб олган. Гумондорнинг банкдан бирор нарса олиб кетган ёки кетмагани, шунингдек, унинг пиёда ёки транспорт воситасида бўлганлиги номаълум.
Полиция расмийлари аҳолини ҳушёр бўлишга, эшикларини қулфлаб қўйишга ва шубҳали бирор нарса кўрса, полицияга қўнғироқ қилишга чақирган.
“Айвондаги чироқни ёқиб қўйинг. Биз ушбу воқеа кўпроқ қурбонлар бўлишига олиб келишини истамаймиз. Умид қиламизки, у шунчаки ўзини топширади”, дейди Скотт Пеннингтон.
Шунингдек, полиция расмийси гумонланувчига тўғридан тўғри йўллаган хабарида: “Сиз жуда кўп муаммога дуч келдингиз. Жуда кўп муаммо. Лекин бошқа биров жароҳат олишидан олдин ўзингизни топширинг”, деган.
Маълумот учун, Береа шаҳри Лексингтондан тахминан 64 километр жанубда жойлашган. Ушбу шаҳарда 16 000 дан ортиқ аҳоли истиқомат қилади.
