Нигер шимолидаги Саҳрои Кабир чўлида камида 49 киши чанқоқликдан ҳалок бўлди. Улар кетаётган юк машинаси энг яқин аҳоли манзилгоҳи ва сув манбасидан ўнлаб километр узоқликда бузилиб қолган.
Маълум қилинишича, ушбу одамлар Малидан Қурбон ҳайити байрамидан қайтаётган бўлган.
Улар Телхандек манзилгоҳидан йўлга чиққан, бироқ Нигернинг Агадез вилояти губернатори баёнотида айтилишича, йўлдан адашиб, Нигер ва Жазоир чегарасидаги Ассамака воҳасидан 80 км узоқликда, атрофи ўнлаб километрга чўзилган ҳудудда бирорта ҳам аҳоли пункти бўлмаган жойда қолиб кетишган.
Ҳайдовчи ва йўловчилар юк машинасини тузатишга ҳаракат қилишган. Аммо сўзлашнинг уддасидан чиқа олишмаган.
Шундай бўлса-да, икки нафар эркак сувга етиб олиш учун 50 километрдан ортиқ йўл босиб, сўнгра Ассамака шаҳри томон йўлни давом эттириб, омон қолган. У ерда улар шаҳар маъмуриятига бузилган юк машинаси ва Саҳрои Кабир чўлида қолиб кетган ўнлаб одамлар ҳақида хабар берган. Шундан сўнг Агадез вилояти губернатори, генерал Иброҳ Булама Исса буйруғи билан воқеа жойига тезкор ҳаракат отряди юборилган.
“Сувсиз қолиб, машинани таъмирлай олмаган аксарият одамлар тирик қололмаган. Ҳаракатсиз юк машинаси остида ва унинг атрофида ўнлаб жонсиз таналар топилди”, дейилади губернатор баёнотида.
Қутқарувчилар уларни умумий қабрга дафн этган. Ҳалок бўлганларнинг барчаси Нигер фуқаролари бўлган.
“Биз узоқ йиллардан бери ушбу ҳолатга қарши курашиб келамиз. Биз ҳайдовчиларга, саёҳатчиларга, иммиграция билан боғлиқ барча шахсларга саҳрони кесиб ўтиш қандай хавф-хатарларга бой эканини тушунтирамиз”, дейди маҳаллий жамоат ташкилотларидан бирининг раҳбари Шеҳуо Азизу.
Таъкидланишича, қутқарувчилар одамлар ҳалок бўлган жойдан қайтаётганида, яна бир бузилган юк машинасига дуч келган. Унда Малидан 60 дан ортиқ одам кетаётган бўлиб, улар уч кундан бери саҳрода қолиб кетган.
Губернаторнинг қўшимча баёнотида маълум қилинишича, қутқарувчилар уларга сув бериб, юк машинасини таъмирлашда ёрдам кўрсатган.
Нигер шимолда Жазоир ва Ливан билан чегарадош бўлиб, Ғарбий Африкадан Ўрта Ер денгизига ва у ердан Европага йўл олган муҳожирларнинг асосий қисми мамлакатнинг айнан шу саҳроли шимолий қисмидан ўтади.
