Тошкент шаҳрининг Чилонзор туманида ўзларини аёл сифатида таништириб, турли ёшдаги эркаклардан пул талаб қилган гуруҳ аниқланди. Бу ҳақда Ички ишлар вазирлиги хабар берди.
Қайд этилишича, 2008, 2007, 2005 ва 2006 йилларда туғилган беш нафар фуқаро ижтимоий тармоқлар, хусусан, Telegram орқали ўзларини аёл сифатида таништириб, турли ёшдаги эркакларга товламачилик қилган. Улар жабрланувчиларни учрашув баҳонасида яшаш хонадонига чақирган.
Маълум бўлишича, гуруҳ ташкилотчиси муқаддам Ўзбекистон Республикаси Жиноят кодексининг 120-моддаси (бесоқолбозлик) билан судланган бўлиб, у спорт билан шуғулланувчи шахсларни ўз атрофига тўплаган.
Мижоз хонадонга киргандан сўнг қўштирноқ остидаги спортчи гуруҳ аъзолари унга икки нафар вояга етмаган бола билан жинсий алоқа қилишга келгансан, деб турли сўзлар билан ҳақорат қилган. Шунингдек, улар “мижоз”ни уриб дўппослаган ва таҳдид қилиб, унинг беҳаё ҳолатини видео тасвирга олиб, 10 миллион сўм пул талаб қилган. Пулни бермаган тақдирда видеоёзувларни интернет тармоғи орқали тарқатиб, шарманда қилиш билан қўрқитган.
Тезкор тадбир давомида гумонланувчилар жабрланувчидан 5 миллион сўм олаётган пайтда қўлга олинган. Мазкур ҳолат юзасидан жиноят иши қўзғатилиб, гумонланувчиларга нисбатан Жиноят кодексининг 165-моддаси (товламачилик) 2-қисм “в” банди билан тергов ҳаракатлари бошланган.
