Сурхондарё вилоятининг Денов туманида аввалдан ишқий муносабатда бўлган эркакнинг видеоларини тарқатиб юбориш билан қўрқитган аёл ушланди. Бу ҳақда вилоят Ички ишлар бошқармаси хабар берди.
Маълум бўлишича, 1992 йилда туғилган шахс ариза билан мурожаат қилган. У 2024 йил август ойида бир аёл билан танишиб, яқин муносабатга киришган. Бир неча ой давом этган ишқий муносабатлар давомида аёл эркакнинг шахсий ва беҳаё фотосурат ва видеоларини тасвирга олган.
Орадан вақт ўтиб аёл ушбу видеоларни интернетга тарқатиш билан қўрқитиб пул талаб қила бошлаган. Дастлаб 7 кейин 5 млн сўм олган. Шунингдек, 2025 йил октябрдан 2026 йил февраль ойига қадар яна 28 млн сўм ва жами 40 миллион сўм пул олган.
Қўрқитиши самара бераётган бу аёл “шантаж” қилишдан тўхтамаган ва эркакдан яна 15 миллион сўм талаб қилган.
Олиб борилган суриштирув ишлари давомида бу товламачи 2003 йилда туғилган қиз эканлиги аниқланган. Ўтказилган тезкор тадбир давомида у талаб қилинган 15 миллион сўмни олаётган пайтида қўлга олинган. Ҳодиса жойида далилий ашёлар расмий тартибда расмийлаштириб олинган.
Мазкур ҳолат юзасидан Жиноят кодексининг 165-моддаси (товламачилик) 1-қисми билан жиноят иши қўзғатилган.
