АҚШнинг Монтана штатида хоккей жамоаси мураббийи уч нафар вояга етмаган шогирдини зўрлаганликда айбдор деб топилиб, 300 йиллик қамоқ жазосига ҳукм қилинди. Бу ҳақда KRTV хабар бермоқда.
50 ёшли Жами Лесли Жеймс Колумбия-Фоллс шаҳридаги ёшлар хоккей клубида мураббий бўлиб ишлаган. 2019–2021-йилларда ўз хизмат мавқейи ва обрўсидан фойдаланиб, 8-9 ёшли болаларга нисбатан жинсий зўравонлик ҳаракатларини амалга оширган. Жиноятлар хоккей оромгоҳларида ва мураббий штат бўйлаб ўтказган машғулотлар пайтида содир бўлган. Терговга кўра, педофил спорт натижалари ҳақида қайғуришни ниқоб қилиб, ўзининг ёш шогирдлари ишончини сурбетларча суиистеъмол қилган.
Жабрланувчиларнинг айтишича, эркак ҳароратини ўлчаш баҳонасида уни зўрлаган, бошқа бир болага эса бу тажриба уни бошқа ўйинчилардан “тезроқ қилишини” ваъда қилган. Бютт шаҳридаги меҳмонхона, мураббийнинг ўз уйи ҳамда кемпинг пайтидаги қайиқ жиноят жойларига айланган. Зўравоннинг даҳшатли хатти-ҳаракатлари болалар руҳиятини ва уларнинг катталарга бўлган ишончини бир умрга синдирган.
Мураббий оғир жиноятларга оид олтита модда бўйича айбдор деб топилиб, камида 60 йил муддатга шартли равишда муддатидан олдин озод қилиш ҳуқуқидан маҳрум этилган.
2026 йил 25 февралда суд уни розиликсиз жинсий алоқага оид олтита модданинг ҳар бири бўйича 100 йиллик қамоқ жазосига ҳукм қилган. Бироқ жазо муддатларининг ярми бир вақтда ўталиши сабабли умумий қамоқ муддати 300 йилни ташкил этган.
Бундан ташқари, унинг исми жинсий жиноятчилар рўйхатига киритилган. Бу ҳолатда озодликка чиқиш эҳтимоли жуда паст бўлса-да, агар шундай бўлса, унга нисбатан умрбод чекловлар ва назорат ўрнатилишини англатади.
Аниқланишича, бу Жеймснинг ҳуқуқ-тартибот идоралари эътиборига тушган биринчи ҳолати эмас. У аввалроқ Калифорния хоккей лигаларида ишлаган, бироқ номақбул хатти-ҳаракатларда гумон қилиниб, ишдан четлатилган. Шундан сўнг у Монтанага кўчиб ўтган ва у ерда мураббийлик фаолиятини давом эттириб, янги қурбонларни излаган.
