Бугун соат 10:00 да Тошкент халқаро аэропортига дунёнинг энг нуфузли футбол соврини — FIFA™ Жаҳон чемпионати кубоги олиб келинди. 6,175 килограмм оғирликдаги асл олтиндан ясалган кубок Coca-Cola компанияси ташаббуси билан ташкил этилган FIFA™ Жаҳон чемпионати кубогининг саёҳати доирасида Ўзбекистонга етиб келди. Мазкур саёҳат 2026 йил 3 январда Саудия Арабистонининг Ар-Риёд шаҳридан бошланган эди.
Кубокни тантанали кутиб олиш маросими Тошкент халқаро аэропортида ўтказилди.
Тадбирда Миллий Олимпия қўмитаси биринчи ўринбосари Отабек Умаров, Ўзбекистон Республикаси спорт вазири Адҳам Икромов, Тошкент шаҳар ҳокими Шавкат Умурзоқов, Ўзбекистон футбол ассоциацияси раисининг биринчи ўринбосари Равшан Ирматов, Coca-Cola компаниясининг Ўзбекистондаги бош директори Казумаса Мукаэ ҳамда Coca-Cola İçecek компанияси бош директори Фуркан Айдин иштирок этдилар.
Кубок билан бирга Тошкентга 2006-йилги жаҳон чемпиони, Италия терма жамоасининг афсонавий футболчиси Марко Матерацси ҳам ташриф буюрди. У Ўзбекистондаги расмий тақдимот давомида асл совринни кузатиб боради.
Coca-Cola компанияси ташаббуси билан ташкил этилган FIFA™ Жаҳон чемпионати кубоги саёҳати футбол мухлисларига жаҳон футболи тарихига бевосита гувоҳ бўлиш ва сайёрамизнинг энг йирик спорт тадбирларидан бирининг иштирокчисига айланиш учун ноёб имконият яратади.
