Эрон дронлари Яқин Шарқ давлатларидаги АҚШ банкларига ҳужум қилди. Бу ҳақда Tasnim агентлиги хабар берди.
Маълум қилинишича, БААнинг Дубай ва Баҳрайннинг Манама шаҳарларидаги Citibank бўлинмалари нишонга олинган. Эрон Ислом инқилоби қўриқчилари корпуси (ИИҚК) ҳужум фактини тасдиқлаган. Улар бу ҳаракатлар яқинда Эроннинг икки банкига берилган зарбага жавоб эканини таъкидлаган.
“Агар тажовуз такрорланса, Америка банкларининг минтақадаги барча бўлимлари бизнинг қонуний нишонимизга айланади”, деб огоҳлантирди ИИҚК вакили Али Муҳаммад Наини.
Шунингдек, 11 март куни Ироқнинг Хор ал-Зубайр портида иккита денгиз дрони Американинг Safesea Vishnu танкерига бориб урилган. Ҳужум пайтида кема 53 минг тонна нафта (нефть маҳсулоти)ни юклаётганди. Портлаш оқибатида кеманинг чап бортида ёнғин чиққан, экипажнинг 28 нафар аъзоси ўзини сувга ташлаган, бир киши ҳалок бўлган.
АҚШнинг Нью Жерси штатида жойлашган Safesea Group компанияси ушбу ҳужумни “олдиндан режалаштирилган ва қасддан қилинган” деб атади. АҚШ ва Исроилнинг Эронга қарши уруши бошланганидан бери Форс кўрфазида камида 16 та кема ҳужумга учради. Шунингдек, юзлаб кемалар Ҳормуз бўғози ва унинг яқинидаги зарбадан қўрқиб, ҳаракатланишни тўхтатди.
Маълумот учун, жаҳон нефть таъминотининг тахминан бешдан бир қисми айнан шу бўғоз орқали ўтади. Ҳормуз блокадаси ва доимий ҳужумлар нефть нархининг кескин ошишига сабаб бўлмоқда.
Citibank дунёнинг 100 дан ортиқ давлатида фаолият юритади. У халқаро савдода доллар операцияларини амалга оширувчи энг йирик молиявий тизимлардан бири ҳисобланади. Таҳлилчиларнинг фикрича, ушбу банк бўлимларининг нишонга олиниши нафақат рамзий маънога эга, балки уруш кўламининг Ғарб иқтисодий инфратузилмасига кўчётганидан далолат беради.
