Ўзбекистонга Switchblade русумидаги учар таксилар 2028-йилдан 2030-йилгача олиб келинади. Бу ҳақда Air Tashkent авиакомпанияси директори ўринбосари Анвар Сулаймонов “Ўзбекистон 24” телеканалига берган интервьюсида маълум қилди.
Унинг қайд этишича, ҳозирги пайтда АҚШнинг Samson Sky компанияси билан сертификатлаш жараёни кетмоқда. Air Tashkent’нинг 10 дан ортиқ ходими Samson Sky компаниясида малака ошириб қайтгач, техник хизмат кўрсатиш бўйича фаолият юритади.
“Air Tashkent билан Samson Sky имзолаган шартномага асосан, уч турда маҳсулотни чиқаришни режалаган. Биринчи турдаги бу бензинли двигательимиз. Иккинчи бу электр двигательимиз. Учинчи бу қуёш панели билан ҳаракатланадиган учар такси. Учар таксилар 800 километргача учиши мумкин. Масалан, олайлик, шу Тошкентдан учди, уч соатда, тўрт соатда Урганчда бўлишингиз мумкин”, деди Анвар Сулаймонов.
Унинг сўзларига кўра, учар таксининг сиғими уч кишидан етти кишигача бўлади. 130 метрлик жой бўлса, у учар таксига айланади. Бундай транспорт ҳавога кўтарилиши учун 3 дақиқани ташкил этади. Учар такси ичида совитиш тизими, навигация тизими ҳамда автопилот тизими мавжуд.
“Бу учар таксимиз муҳит танламайди, ҳар қандай об-ҳаво шароитларида учиши мумкин. Автопилот тизими орқали учар такси ҳайдовчисиз учиши мумкин. Лекин хавфсизлик нуқтаи назаридан, ҳайдовчи пультда ўтириши шарт”, дея қайд этди Анвар Сулаймонов.
Хабарда қайд этилишича, лойиҳанинг босқичма-босқич амалга оширилиши яқин келажакда мамлакат бўйлаб ҳаракатланиши кўзда тутилаётган учар таксиларнинг одатий манзарага айланишига хизмат қилади.
