Мадриднинг “Реал” клуби ярим ҳимоячиси Арда Гюлер фаолиятини Англия Премьер Лигасида давом эттириши мумкин. Fichajes нашрининг ёзишича, туркиялик футболчига “Манчестер Сити” жиддий қизиқмоқда.
Гюлер жорий мавсум “қироллик клуби” сафида сермаҳсул ўйин кўрсатиб, кўплаб топ-клублар эътиборига тушди. Шундан сўнг “Сити” бош мураббийи Пеп Гвардиола ҳам Арданинг ўйинини диққат билан кузата бошлаган. Маълумотларга кўра, испаниялик мутахассис туркиялик юлдузни жамоага олиб келишни истамоқда ва “шаҳарликлар” уни қўлга киритиш учун 100 миллион евро таклиф қилишга тайёр. Аммо “Реал” раҳбарияти бу суммани музокара бошлаш учун ҳам етарли эмас деб ҳисобламоқда.
Гвардиола Гюлерни ўйин тақдирини ўзгартира оладиган футболчи сифатида кўрмоқда. Мураббийга яқин манбалар у Арданинг маҳоратига “мафтун бўлгани”, шунингдек, ярим ҳимоячини ўз тизимига жуда мос деб билишини таъкидламоқда. Агар томонлар келишувга эриша олса, туркиялик иқтидор фаолиятини Англия Премьер Лигасида давом эттириши мумкин.
Маълумот учун, Арда Гюлер жорий мавсум “Реал Мадрид” таркибида 16 та ўйинда майдонга тушиб, 3 та гол ва 6 та голли узатма қайд этган. Унинг клуб билан шартномаси 2029-йилгача амал қилади. Transfermarkt портали Гюлернинг бозор қийматини 60 миллион еврога баҳолаган.
