Давлат хавфсизлик хизматининг Қашқадарё вилояти бўйича бошқармаси ҳамда Иқтисодий жиноятларга қарши курашиш департаменти ходимлари ҳамкорлигида Самарқанд вилоятининг Каттақўрғон туманида ўтказилган тезкор тадбирда олтиннинг ноқонуний савдоси тўхтатиб қолинди.
Хусусан, тадбир давомида Навоий ва Самарқанд вилоятларида яшовчи, 1982, 1984 ва 1996-йилларда туғилган уч нафар фуқаро қонунга хилоф равишда жами оғирлиги 475 граммни ташкил қилган икки бўлак олтин қуймаларни харидорга 737 млн сўмга сотишга келишиб, олдиндан 500 млн сўм олган вақтида ашёвий далиллар билан ушланган.
Давлат асиллик даражаси назорати инспекциясининг тегишли хулосасига кўра, 994 асиллик даражасидаги ушбу олтин қуймаларнинг соф оғирлиги 472 грамм бўлиб, умумий қиймати 740,4 миллион сўмни ташкил этади.
Ҳозирда мазкур шахсларга нисбатан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) 4-қисми “а” банди билан жиноят иши қўзғатилиб, тергов ҳаракатлари олиб борилмоқда. Ушбу модда билан айбдор деб топилганлар БҲМнинг 75 бараваридан 100 бараваригача миқдорда жарима ёки икки йилдан уч йилгача ахлоқ тузатиш ишлари ёхуд бир йилгача озодликни чеклаш ёки бир йилгача озодликдан маҳрум қилиш билан жазоланади.
Таъкидланишича, мазкур шахсларнинг икки нафари муқаддам судланган бўлиб, улардан бири ҳозирда ахлоқ тузатиш ишлари жазосини ўтаётган бўлган.
