“Манчестер Сити” ва Италия терма жамоаси дарвозабони Жанлуижи Доннарумма 2025-йилнинг энг яхши дарвозабони сифатида эътироф этилди. Бу ҳақда FIFA матбуот хизмати маълум қилди.
“Барчага раҳмат. Бу совринни қўлга киритиш – мен учун улкан шараф. Умид қиламанки, шу тарзда давом этаман ва янада кўпроқ меҳнат қиламан”, деди Доннарумма.
Қайд этилишича, Жанлуижи Доннарумма 2017 йилда ушбу мукофотга сазовор бўлган Жанлуижи Буффондан сўнг, уни қўлга киритган иккинчи италиялик дарвозабон бўлди.
Ортда қолган мавсумда италиялик посбон “ПСЖ” сафида Европа Чемпионлар Лигасида зафар қучди, Франция чемпионлигини қўлга киритди, шунингдек, Франция кубогида ғалаба қозонди. Ёзги трансферлар ойнасида Доннарумма 35 миллион евро эвазига “Манчестер Сити” жамоасига кўчиб ўтди.
Бундан ташқари, у Чемпионлар Лигаси мавсум рамзий терма жамоасидан ҳам ўрин олган эди.
Мазкур мукофот учун шунингдек, Алиссон (“Ливерпуль” ва Бразилия), Тибо Куртуа (“Реал Мадрид” ва Бельгия), Эмилиано Мартинес (“Астон Вилла” ва Аргентина), Мануэль Нойер (“Бавария” ва Германия), Давид Рая (“Арсенал” ва Испания), Ян Зоммер (“Интер” ва Швейцария) ҳамда Войтцех Шенсни (“Барселона” ва Польша) даъвогарлик қилаётган эди.
Айни пайтга қадар Доннарумма “Манчестер Сити” сафида 18 та учрашувда майдонга тушиб, 16 та гол ўтказиб юборган ва 8 бор ўз дарвозасини дахлсиз сақлаб қолган.
Маълумот учун, 2023 ва 2024 йилларда The Best мукофоти “Астон Вилла” дарвозабони Эмилиано Мартинесга насиб этган эди.
Бугун, 16 декабрь куни Тошкент вақти билан соат 22:00 да FIFA талқини бўйича 2025 йилнинг энг яхши футболчиси мукофотини топшириш маросими бўлиб ўтади.
