Telegram мессенжеридаги t.me қисқа ҳаволалари бутун дунё бўйлаб ишламай қолди. Бу ҳақда Павел Дуров ўзининг Х’даги саҳифасида маълум қилди.
Қайд этилишича, 14 июлга ўтар кечаси Telegram’га тегишли t.me домени глобал ДНС тизимидан чиқарилган. Шундан сўнг ушбу домен орқали яратилган канал, гуруҳ, профиль ва таклиф ҳаволалари ишламай қолган.
Telegram асосчиси Павел Дуров муаммо юзасидан .me домен зонаси операторига мурожаат қилган.
“Салом, @domainME. t.me ҳаволалари ишламай қолди. Буни текшириб кўра оласизми?”, деб ёзган Дуров.
Ҳозирча t.me доменининг нима сабабдан ишламай қолгани расман маълум қилинмаган. .me домен зонаси оператори ҳам мазкур ҳолат юзасидан изоҳ бермаган.
Telegram вақтинчалик ечим сифатида янги ҳаволаларни telegram.me домени орқали шакллантиришни бошлаган. Энди иловада канал, пост ёки профиль ҳаволаси нусхаланганда, t.me ўрнига telegram.me манзили кўрсатилмоқда.
Муаммо доменнинг амал қилиш муддати тугагани билан боғлиқ эмас. t.me домени Telegram номи учун 2035 йил май ойигача рўйхатдан ўтказилган ва унинг ном серверлари ўзгармаган.
