Бухоро шаҳридаги марказий «Карвон савдо комплекси»даги умумий овқатланиш ошхонасида ёнғин юзага келди. Бу ҳақда Бухоро вилояти Фавқулодда вазиятлар бошқармаси Ахборот хизмати маълум қилди.
Таъкидланишича, жорий йилнинг 14 июль куни соат 01:31 да «112» тизими орқали Бухоро шаҳрининг Газли шоҳ кўчасида жойлашган «Карвон савдо комплекси» ҳудудидаги умумий овқатланиш ошхонасида ёнғин содир бўлаётгани ҳақида Бухоро вилояти Фавқулодда вазиятлар бошқармасига хабар келиб тушган.
Хабарга асосан, воқеа жойига 4 та ёнғин-қутқарув экипажи жалб этилган. Қутқарув бўлинмалари соат 01:40 да манзилга етиб бориб, ёнғинни соат 01:42 да қуршаб олган ва соат 02:05 да тўлиқ бартараф этилган.
Дастлабки маълумотларга кўра, ёнғин оқибатида умумий овқатланиш ошхонасининг 36 квадрат метр майдони ёниб зарарланган. Қутқарувчиларнинг тезкор ва самарали ҳаракатлари туфайли ошхонанинг 150 квадрат метр қисми ҳамда атрофда жойлашган савдо дўконлари ёнғиндан сақлаб қолинган.
Ҳодиса оқибатида ҳалок бўлганлар ва тан жароҳати олганлар йўқ.
Айни пайтда ёнғиннинг келиб чиқиш сабаблари ҳамда етказилган моддий зарар миқдори аниқланмоқда.
