Англиянинг “Ливерпуль” клуби 20 ёшли франциялик марказий ҳимоячи Жереми Жакенинг трансферини эълон қилди.
“Биз Франциянинг ‘Ренн’ жамоаси билан ҳимоячи Жереми Жакени трансфер қилиш бўйича келишувга эришдик. Футболчи 2026/2027 йилги мавсум олдидан клубга қўшилади. Бунда ишга рухсат ва халқаро лицензия олиниши шарти мавжуд,” дейилади клуб расмий сайтида.
Жереми Жаке ушбу мавсумда “Ренн” сафида барча турнирларда 19 та ўйинда майдонга тушган, лекин гол ёки ассист каби самарали ҳаракатлар қайд этилмаган. Шунингдек, унинг ҳисобида Франция ёшлар терма жамоаси сафида 5 та ўйин мавжуд.
2024 йилда Жаке Франция U-19 терма жамоасининг Европа чемпионатида финалга етиб боришида ёрдам берган ва турнир якунида мусобақанинг рамзий жамоасига киритилган.
Transfermarkt портали футболчининг бозор қийматини 20 миллион еврога баҳолаган.
Маълум қилинишича, Мерсисайд клуби футболчи учун асосий сумма сифатида 50 миллион фунт стерлинг тўлашга рози бўлган, шунингдек, қайд этиладиган натижаларга қараб бонус сифатида яна 10 миллион фунт стерлинг қўшимча маблағ ажратилади. Жереми Жаке билан узоқ муддатли шартнома имзоланган.
