Украинада президент офиси раҳбари Андрей Ермакнинг уйида тинтув ўтказилди. Бу ҳақда “Украинская правда” нашри хабар берди.
Тергов ҳаракатларида Украина Миллий коррупцияга қарши бюроси (NABU) ва Ихтисослашган коррупцияга қарши прокуратура иштирок этмоқда. Тинтув кенг кўламли коррупция можароси фонида ўтказилмоқда. Мазкур иш давлатга қарашли “Энергоатом” компанияси орқали энергетика соҳасидан тахминан 100 миллион доллар маблағни ноқонуний ундириш схемаси билан боғлиқ.
Ишга адлия вазири Герман Галушченко, энергетика вазири Свитлана Хринчук, атом энергетикаси агентлиги мансабдорлари ва Давлат тергов бюросининг юқори лавозимли амалдорлари ҳам алоқадор сифатида тилга олинмоқда.
Можаронинг марказида Зеленскийнинг яқин ҳамкори, собиқ бизнес шериги ва тадбиркор Тимур Миндич турибди. Ҳолат сиёсий майдонда “Миндичгейт” номи билан тилга олинмоқда. Андерй Ермак эса бу ишда Коррупцияга қарши миллий бюро ва Махсус прокуратура фаолиятига тўсқинлик қилганликда айбланмоқда. Мухолифат Ермакнинг истеъфосини талаб қилмоқда, бироқ Зеленский ҳозирча ўз идораси раҳбарини лавозимидан озод этмоқчи эмас.
Шу билан бирга, Ермак яқинда Женевада Европа иттифоқчи вакиллари иштирокида бўлиб ўтган музокараларда Украина делегациясига раҳбарлик қилди. Унда АҚШ томонидан урушни тўхтатиш учун таклиф этилган 28 бандли режа муҳокама қилинган. Андрей Ермак уйида тинтув ўтказилаётганини тасдиқлади.
“Терговчиларга ҳеч қандай тўсқинлик йўқ. Уларга квартирага тўлиқ кириш имконияти берилган. Жойида менинг адвокатларим бор ва улар ҳуқуқ-тартибот идоралари билан ҳамкорлик қилмоқда. Менинг томонимдан тўлиқ кўмак бор”, деб ёзди у Telegram каналида.
Олий Рада депутати Алексей Гончаренконинг таъкидлашича, NABU яқин вақт ичида Ермакка нисбатан расмий айблов эълон қилиши мумкин.
