Жорий йилнинг 26 ноябрь куни Боливия кубогининг чорак финалида “Реал Оруро” ва “Блуминг” ўртасидаги учрашув катта жанжал билан якунланди. “Блуминг” клуби икки ўйин натижасига кўра 4:3 ҳисобида ғалаба қозониб, ярим финалга йўлланма олди. Бироқ ҳакамнинг сўнгги қароридан сўнг майдонда каттагина тартибсизлик юзага келди ва натижада ушбу учрашув 17 та қизил карточка кўрсатилган ўйин сифатида тарихга кирди.
Воқеалар ҳакамнинг якуний ҳуштагидан сўнг бошланиб, футболчилар, мураббийлар ва ходимлар ўртасида муштлашувга олиб келди. “Реал Оруро” футболчилари чорак финалга чиқа олмагани учун норозилик билдирган. “Реал Оруро”нинг ўйинчиси Себастьян Зебаллос рақиб футболчилар билан муштлашиб, уларни тепишни бошлаган, жамоадоши Хулио Вила эса унга қўшилган. Шу пайтда “Реал Оруро” устози Марсело Ребольедо “Блуминг” мураббийига ҳужум қилган.
Муштлашув давомида зарбалар ва очиқ жароҳатлар юзага келган. Полиция воқеага аралашиб, вазиятни тинчлантириш учун кўздан ёш оқизувчи газ ишлатган.
Боливия оммавий ахборот воситалари хабар беришича, Боливиядаги Спорт интизом суди зудлик билан тергов бошлаган. “Блуминг” мураббийлар штабининг бир аъзоси рақиб футболчининг зарбасидан ёноқ суягини синдириб олгани айтилмоқда.
