АҚШ Россияга қарши янги санкциялар пакетини тайёрлаб қўйган, бироқ ҳозирча уларни жорий этмаяпти. Бу ҳақда “Bloomberg” хабар берди.
Манбаларнинг аниқлик киритишича, ҳозирда бу чекловлар яқин вақт ичида кучга киришидан далолат берувчи аломат йўқ. Шу билан бирга, Европа Иттифоқи ҳам Россиянинг Украинадаги махсус ҳарбий операцияси бошланиши санасига боғлаб эълон қилиниши режалаштирилган янги санкциялар пакетини тайёрлаган. Ҳозирча ЕИнинг 20-санкциялар пакетини қабул қилиш кечиктирилмоқда, бироқ Еврокомиссия уни исталган кунда тасдиқлаши мумкин.
Нашрга анонимлик шарти билан изоҳ берган манбаларнинг айтишича, АҚШ Россияга қарши қўшимча санкцияларни тайёрлаб қўйган, аммо ҳозирча бу чекловлар қабул қилиниши кутилаётгани ҳақида аниқ белгилар йўқ.
Ўтган йилнинг декабрь ойи ўрталарида нашр вазиятдан хабардор манбаларга таяниб, АҚШ Россия ва Украина ўртасида тинчлик келишуви муваффақиятсиз якунланган тақдирда жорий этилиши мумкин бўлган янги санкцияларни тайёрлаётгани ҳақида ёзган эди. Унга кўра, вариантлар орасида Россия нефтини ташиётган танкерларнинг “соя флоти” кемаларини таъқиб қилиш, шунингдек, бундай операцияларга кўмаклашаётган трейдерларга қарши чоралар кўриш ҳам бор.
Қайд этиш жоиз, ҳозиргача Европа Иттифоқи Россияга қарши 19 та санкциялар пакетини жорий қилган, охиргиси ўтган йилнинг октябрь ойида кучга кирган. ЕИ баёнотига кўра, қўшимча чекловлар Россия банклари ва электрон тўлов тизимларига, шунингдек, Россияга санкцияларни четлаб ўтишда ёрдам берган айрим хорижий компанияларга тааллуқли бўлган.
