Норвегияда дунёдаги энг узун ва энг чуқур сувости автомобиль йўли туннели қурилмоқда. Бу ҳақда CNN хабар берди.
Узунлиги 27 километр бўлган бу туннел Рогфаст деб номланади. Бу ном Норвегиянинг ушбу ҳудудига тегишли Rogaland fastforbindelse (Рогаланд стационар алоқаси) сўзининг қисқартмасидир. Туннелнинг энг чуқур нуқтаси денгиз сатҳидан 392 метр пастда бўлади.
Лойиҳа тарихи ва харажатлар
Қурилиш ишлари 2018 йил январь ойида бошланган, бироқ кутилган харажатлар ошиб кетиши сабабли 2019 йил охирида тўхтатилган эди. Бу ҳолат мавжуд шартномаларнинг бекор қилиниши ва лойиҳанинг қайта тузилишига олиб келган. Ишлар 2021 йил охирида қайта тикланган ва туннелни 2033-йилда якунлаш режалаштирилмоқда. Лойиҳанинг умумий қиймати, тахминан, 25 миллиард Норвегия кронаси (тахминан 2,4 миллиард доллар)га баҳоланмоқда.
Қатнов вақти қисқаради
Рогфаст туннели ҳозирги паром қатновлари ўрнини эгаллаб, Норвегиянинг аҳоли сони бўйича иккинчи ва тўртинчи йирик шаҳарлари — Берген ва Ставангер ўртасидаги қатнов вақтини тахминан 40 дақиқага қисқартиради, шунингдек, кундалик қатновни анча осонлаштиради.
Туннел икки алоҳида қувурдан иборат бўлиб, уларнинг ҳар бирида икки ҳаракатланиш бўлаги жойлашади. Лойиҳанинг ўрталарида, денгиз сатҳидан 260 метр чуқурликда, ноодатий дизайн элементи — қўшалоқ айланма йўл ўрнатилади. Ушбу айланма йўл мамлакатнинг энг кичик муниципалитети бўлган Квицой оролига элтувчи туннелга уланади.
Айни пайтда, денгиз остида бундай узунликдаги туннел қуриш қатор технологик қийинчиликларни келтириб чиқаради. Кўпгина замонавий туннеллар сингари, Рогфаст ҳам вақтни тежаш учун бир вақтнинг ўзида икки учидан қазилмоқда.
Катта режанинг бир қисми
Рогфаст лойиҳаси Э39 қирғоқ магистралини таъмирлаш режасининг бир қисмидир. Шимолдаги Тронхеймдан жанубдаги Кристиансандгача чўзилган 1100 километрлик бу йўлни босиб ўтиш ҳозирда етти паром қатнови билан 21 соатни ташкил этади. Мақсад кўприклар ва туннеллар қуриш орқали йўлни паромларсиз босб ўтиш ва саёҳат вақтини икки баравар қисқартиришдир.
Туннелда ҳайдовчиларни ҳаво ифлосланишидан ҳимоя қилиш чоралари ҳам кўрилади. Махсус шамоллатиш тизими, шу жумладан, Квицойгача чўзилган вентиляция шахталари ўрнатилади. Бундан ташқари, носозликлар ёки тирбандликларни аниқлаш учун реал вақт режимида воқеа-ҳодисалар ҳақида огоҳлантириш тизими, кузатув камералари ва радар ҳам ишга туширилади.
Айни пайтда дунёдаги энг узун сувости туннели Япониядаги Сейкан туннелидир. У 53,3 километрли темир йўлни ҳам ўз ичига олиб, сув остидаги қисми 23,3 километрни ташкил этади.
